NAGPAHIMANGNO ang Regulatory and Complaint Board (RCB) ngadto na sa mga establisyamento nga naghanyag og “extra services” sa ilang mga kustomer.
Kini human usa ka lalaki (dili buot magpa-ila) ang mibutyag nga gitanyagan siya sa masahista sa usa ka spa nga lakipon og masahe ang pribadong parte sa iyang lawas niadtong Lunes.
“Sir kani among pagmasahe sir walay labot ang ‘private parts’ atong masaheon imong private sir, unsa nama’y buot pasabot ato?” pahayag sa maong lalaki dihang gihinabi sa SunStar Superbalita.
Samtang gibutyag ni Antonio Resma Jr., secretary sa RCB ug Inspectorate Team Leader, nga nanghinaot kini nga mokooperar ang mga matag establisyamento ilabi na sa pagpatuman sa mga palisiya.
“Yes, definitely bawal na. Atong message sa mga business establishments nga unta mo cooperate sila and mag-implement sila og policy to prevent and deter ani nga mga activities sa ilang spa or massage clinic,” matud ni Resma.
Gi-warningan usab niini ang maong mga establisyamento nga masapon gihapon kini ilabi na nga naay mga operasiyon nga ilang pagahimuon kalabot na sa mga kalihokan nga susama niini.
“Dala warning nalang pud namo kay naa’y mga operations ang RCB ug atong mga partners sa law enforcement agencies, PNP ug NBI, sa pag check sa ilahang compliance,” dugang ni Resma.
Padayon usab ang panawagan ngadto sa katawhan nga kung makasapon sa susama niini i-report gyud dayon sa ilang buhatan.