NAPIKAS ang lawas sa magtiayon human nalatayan sa trailer truck Martes sa gabii, Enero 16, sa Barra lungsod sa Opol, Misamis Oriental hinungdan sa kamatayon niini.
Si Senior Police Officer 1 (SPO1) Arnel Acero, traffic investigator sa Opol Municipal Police Station, miila sa magtiayon nga mao si Mary June ug Arvin Mabao, residente sa susamang dapit.
Nitumaw sa taho nga mabdos ang asawa ug ang bana naputlan pa og tiil.
Sa imbestigasyon sa kapulisan nasuta sakay sa ilang motorsiklo ang magtiayon ug dihang paliko kini kalit kining nadumbol sa trailer truck nga kargado og mga softdrinks nga gimenaho ni Edgardo Malasarte, taga Kapatagan, Lanao del Sur.
Human sa pagkadumbol milagpot ang mga biktima sa highway nga maoy hinungdan nalatayan pa gyod kini sa trailer truck.
Matud ni Acero nga 40 metros ang kalay-on nga naguyod ang mga biktima gikan sa lugar nga unang nadumbol.
Ang driver sa trailer truck kinsa unang gikareport nga lango sa ilimnong makahubog nihimikak ug miingon nga wala kini kamatouran.
“Wala koy intension nga ligsan ang motor kay likay man gani ko unsay angayan malikayan,” matud sa driver ug miingon nga gikan sila nagkarga og softdrinks sa dakong kompanya sa Villanueva, Misamis Oriental.
Kasong reckless imprudence resulting to multiple homicide and damage to properties ang atubangon sa driver nga karon nagtingkagol na sa prisuhan.