DUHA ka mga lalaki ang dead on arrival sa tambalanan human napatay sa drug operation niadtong Martes sa gabii, Enero 16, sa Malanang lungsod sa Opol, Misamis Oriental.
Target sa joint operation ang Regional Drug Enforcement Unit (RDEU) ug Opol Police Station si Nicanor Macalalag Jr, lumad sa Iligan City kinsa positibo nga napalitan og gamay nga pakete sa gituohang shabu sa usa ka polis nga nagpatuong buyer.
Apan ang kauban niini nga si Joseph Macale, usa ka driver sa taxi, ang nakabantay nga polis ang katransaksyon ug misuway pagbunlot sa iyang kalibre 38 ug namusil. Gani labihan ang dagan-dagan sa usa ka polis rason nga nag return fire ang back-up nga mga polis.
Giingong si Macalalag misuway pa og labay og granada sa kapulisan hinungdan lakip kini sa gipusil sa mga back-up nga polis.
Gipangdala pa sa Northern Mindanao Medical Center (NMMC) apan pulos nakabsan sa kinabuhi.
Ang kapulisan nag-ingon nga dinagko ang transaksyon sa duha ug taud-taod na nga gimonitor. Nakuha ang duha ka pakete sa gituohang shabu, kalibre 38 ug ang granada nga gipabuto na usab ning panahona sa Explosives Ordinance Disposal.
Si Police Senior Superintendent Rolando Destura kinsa provincial director sa Misamis Oriental Provincial Police Office (Moppo) niingon nga unta kining mga target sa operasyon dili lang magpakita sa pagsukol tungod kay daghan ilang mga operasyon nga walay napatay.
Ang duha ka mga patay’ng lawas gidala na sa Everlasting Funeral Homes.