GIPANGITA karon ang usa ka lalaki nga gidudahang adunay kalambigitan sa kamatayon sa kapuyo niini sa Alae, lungsod sa Manolo Fortich, Bukidnon.
Nagpatabang sa kapulisan ug mga sakop sa media si Anacel Montenegro human ang iyang inahan nga si Emeteria Tecson, 54, namatay sa walay igong rason ug human sa kamatayon niini nawala ang kapuyo niini nga si Edgar Maglangit.
Saysay ni Montenegro nga dead on arrival iyang inahan sa Northern Mindanao Medical Center (NMMC) ning siyudad sa Cagayan de Oro dihang gidala niadtong alas 11:00 Dominggo sa gabii, Enero 13.
Nag-uban pa si Maglangit pagdala sa ospital apan dihang namatay si Tecson kalit kining nawala.
Ang mga doctor mi-abiso sa hingtungdan nga ipa-otopsiya ang patay’ng lawas sa inahan.
Kini human sab ilang nakita nga adunay lagom sa liog nga gituohang agi sa tinuokan ug nanglagom usab ang mga kamot.
“Dili ko makatoo nga mamatay siya kay baskog pa kaayo nakatawag pa gani buntag ato nga adlaw ug wala siya’y reklamo nga sakit sa iyang lawas unya pagka gabii maoy motabo namo nga estorya namatay na siya,” matud ni Montenegro kinsa anaa na nagpuyo sa Iligan.
Dihang ilang gi-adtuan sa puloy-anan sa Manolo Fortich wala sab mosulti sa nahitabo sa iyang inahan nga iyang gidudahan gitabunan.
Matud ni Montenegro ang iyang inahan nagsulti nga kanunay siya kulatahon sa iyang kaipon tungod kay magsige og selos.
Gikatakdang mosango sa mga responsableng ahensya si Montenegro aron mahatagan og katin-awan ang kamatayon sa iyang inahan nga dako ang pagtuo niining gipatay.