GIPAHIBAWO sa Department of Health (DOH)-Central Visayas nga mamahimong mapasakaan og kaso kining mga nanag-iya og social media accounts nga nagpakatap niining sayop nga impormasyon kabahin sa HIV.
Nikatap karon sa Facebook kining daw gidili una ang pagkaon og isda kay daw magka-HIV subay niining medical waste nga napalgan sa baybayon sa Mactan Channel.
Matod sa program director sa HIV/Aids sa DOH-Central Visayas Dr. Van Phillip Baton nga dili makuha ang HIV pinaagi sa pagkaon.
"Definitely, di makuha ang HIV through food. The first letter of the HIV means human (Human Immunodeficiency Virus). It signifies that only human beings can carry and transmit the virus," matod ni Baton.
Giklaro usab niini nga dili makalangoy ang virus tungod kay dili kini makasurvive gawas sa lawas.
"Can swimming in sea water transmit the virus? No, because the virus cannot survive for long outside the human body," ni Baton.
Dugang niini nga aduna'y probisyon sa bag-ong balaod sa Republic Act 11166 o ang Philippine HIV and Aids Policy Act nga mamahimong mapriso kining nagpataka og pakatap sa social media kabahin sa sayop nga impormasyon sa HIV.
Subay sa section 22 sa maong balaod o ang "Misinformation on HIV and Aids," mamahimo nga mapriso gikan sa usa ka tuig hangtod 10 ka tuig ang mapamatud-an nga nakalapas niini ingon man multa nga P50,000 o di moubos sa P500,000.
Giklaro usab sa Bureau of Fisheries and Aquatic Resources (BFAR)-Central Visayas nga wala'y basehan kining nikatap nga mga post.
Matod sa tigpamaba sa BFAR-Central Visayas Alma Saavedra nga dili mokaon og rubber o plastic ang isda, hinungdan nga layo ang posibilidad nga ma-infected ang isda sa HIV kon pananglitan nga aduna'y dugo ang medical waste nga napalgan sa baybayon.
Ug usa pa, dili na moduol ang isda sa baybayon nga mao'y dapit nga napalgan kining mga medical waste.
Tambag niini sa publiko nga padayon sa pagkaon og isda o uban pa nga mga mamahimong pagkaon gikan sa dagat tungod kay luwas kini.