ANG Cebu City Police Office (CCPO) andam na sa posibling mahitabo atol sa adlaw sa solemn procession sa Sabado ug sa Sinulog grand parade sa Domingo.
Kapin sa 6 mil ka mga police ug mga volunteers andam na sa sunod-sunod nga simulation exercise ang gihimo karon sa CCPO alang na sa hugot nga pagpangandam sa siguridad sa Sinulog grand parade sa Domingo.
Matod ni Superintendent Wilbert Parilla, hepe sa Operation Branch sa CCPO, nga tulo ka scenario ang ilang gipangandaman: ang insidente sa pagpamusil, pagpamomba, ug ang stampede sa rota sa Sinulog.
Iyang gitug-an nga ila na kining giplanohan kung unsaon sa pag-responde sa mga police kung kini maoy mahitabo atol sa pagdagsa na sa mga tawo sa ruta sa Sinulog diin lisud na nga makalusot ang mga sakyanan.
Gibahin ni Senior Superintendent Royina Garma ngadto sa 11 ka sector ang mga police nga gipakatap sa ruta sa Sinulog diin ang matag0sector kompleto kini sa kagamitan.
Aduna usab silay tagsa-tagsa ka mga K9 units ug explosive ordnance disposal teams nga motubag sa alarma kung adunay gibiyaan nga bag nga posibling gisudlan sa bomba lakip na ang medical team.
Gawas sa kapin duha ka libo ka mga unipormadong police personnel nga ilatag sa kadalanan, aduna usab silay mga covert personnel nga ang ilang tahas mao ang pagpaniid sa mga kriminal nga mag suroy-suroy.
Wala na nila hilabti ang mga police sa 11 ka police station aron dili maapektohan ang ilang anti- =criminality campaign ug pagpanakop sa mga nalambigit sa illegal nga drugas.