MASUSO nga namatay human sa 15 ka adlaw nga pagkahimugso giingong nabuhi sa dihang gidala sa simbahan aron pabunyagan sa pari sa Barangay Tabunok, siyudad sa Talisay, niadtong Martes sa udto, Enero 15.
Usa sa mga barangay tanod sa Tabunok nga nahinabi sa sibyaanang DyHP nga si Judan Canobida, nitug-an nga nakakita siya nga ang masuso sud sa lungon nilihok ug ang mga mata nibuka.
Nakita usab kini ni Padre Peter Monterol sa St. Joseph the Worker Parisk, kinsa niinsister sa mga ginikanan nga dad-on una kini sa tambalanan aron masalbar ang bata.
“Nakita nako nga nilihok ang bata. Hasta si padre Monterol (nakakita) nya gi adbaysan sila nga dalhon lang sa sa hospital,” matod ni Canobida.
Si Monterol giingong nitunol og kwarta sa mga ginikanan aron dad-on sa ospital.
Sa nakuha nga kasayuran sa Superbalita Cebu, natawo ang masuso sa magtiayong Abellana niadtong Disyembre 30 sa may Sityo Cruzan, Barangay Bulacao, dakbayan sa Talisay.
Giingong premature kun kulang sa adlaw ang masuso, ug pagka alas 5 sa kaadlawon sa Martes, Enero 15, giingong namatay ang bata.
Nasayran ning mantalaan nga usa ka mananabang ang nipaanak sa inahan niini, kinsa wa nganli sa tanod.
Wa usab dad-a sa doktor sa mga ginikanan ang masuso aron unta makompirmar kon namatay ba kini.
Nakahukom ang mga ginikanan ni baby Anghelo Abellana nga pabunyagan siya sa simbahan una ilubong pagkaudto niadtong Martes Enero 15.
Didto na namatikdan nga nilihok ang masuso sud sa simbahan.
Nasayran sa Superbalita Cebu nga human makuha sa lungon, gipasuso og suway sa inahan ang masuso.
Si Monterol wa na moluwat og pamahayag sa dihang gipangutana sa dyHP sanglit ang mga ginikanan ang moesplikar sa hitabo.
Ang masuso gideklarar nga dead on arrival (DOA) sa Talisay District Hospital.
Ang amahan sa bata nagdumili usab sa pagpakighinabi sa mga tigbalita sa dihang gipangutana labot sa hitabo.
Usa ka pediatrician, espesyalistang doktor sa mga bata kinsa di gustong nganlan, nisulti sa Superbalita Cebu nga hayan buhi ang masuso dihang gisulod sa lungon.
Apan nidumili siya sa paghimog dugang espekulasyon kay mas maayo unta kon nahiling kini og doktor sa wa pa gisud sa lungon.
Gisusi na sa Talisay Police Station ang hitabo aron pagtino kon wa bay foul play.
Wa usay taga tambalanan nga niluwat og pamahayag unsay namatyan sa bata.