SUPERBALITA CEBU

Radaza: Walay taho nga nasakit tungod sa isda

Luwas ra kaunon ang isda Lapu-Lapu. (SunStar file)

GIKLARO karon ni Lapu-Lapu City Mayor Paz Radaza nga sa pagkakaron, walay niabot nga taho sa iyang buhatan nga nagkasakit gumikan sa pagkaon sa isda sa kadagatan sa dakbayan sa Lapu-Lapu.

Kini ang pamahayag sa mayor human adunay mga gipasa-pasa nga mga mensahe karon sa text ug ingon man sa social media nga nag-awhag sa publiko mahitungod sa dili una pagkaon ug isda o kinhason sa kadagatan gumikan sa napalgang mga hospital waste sa dakbayan sa milabayng mga adlaw.

Ang Environmental Management Bureau (EMB)-Central Visayas mihimo na ug water sampling sa kadagatan sa Mactan sa miaging Biyernes apan wa pay resulta kalabot niini.

Dugang ni Radaza dili usab ang tibuok kadagatan sa dakbayan ang apektado sa pagdagsa sa mga hospital wastes sukad pa sa miaging semana sanglit bugtong ang mga barangay lang nga nag-atubang sa dakbayan sa Mandaue diin giingong gikan ang naasoyng hugaw ang gidagsaan niini.

Ang maong mga barangay mao ang Ibo, Pusok, Pajo, Buaya, Mactan, Poblacion, Punta Engaño ug Canjulao.

Gibutyag hinuon sa mayor nga kung ugaling ang uban dili mokaon ug isda sa pagkakaron, ilaha sad kini nga desisyon.

Apan giklaro niya nga pabiling luwas ang isda ug kinhason sa dakbayan.

“Ug dili sila comfortable, dili lang gyud nato sila (pugson). Even if ma-esplikahan nga safe ra gyud, pero ug lain ilang paminaw di sad ta mapugos gyud kay duna rabay psychological effect ni kay ug magsige lain ato hunahuna maglain raba pud atong lawas,” pagpasabot ni Radaza.

Gawas sa mga konsumidor, giangkon sa mayor nga adunay mga mananagat ug manginhasay sa dakbayan nga giingong wa una managat ug manginhas gumikan sa kahadlok nga mokaon sa ilang mga kuha.

Sa pagkakaron, gikatakdang hatagan sila sa dakbayan ug mga food packs aron usab dili maapektahan ang ilang panginabuhian.

Usa ka director sa sales and marketing sa usa ka resort sa Barangay Maribago mikompirmar sa SuperBalita Cebu nga walay hospital waste nga miabot sa ilahang resort nga nahimutang sa pikas habig sa dakbayan nga wala mag-atubang sa dakbayan sa Mandaue.

Gibutyag hinuon ni Yzl Cruz sa Happy Beach nga adunay tulo ka mga guest sa ilahang resort ang nagpa-cancel sa ilang booking gumikan sa balita kalabot sa hospital waste nga midagsa sa dakbayan apan pulos kini mga taga kaulohan nga posibleng nagduha duha ug dayon sa ilang pagbisita sa dakbayan.

Padayon usab nga nangaon sa mga potaheng isda ug ubang seafoods sa ilang restaurant ang mga ilang mga guest.

“Kung meron man po dapat, wala po kaming maraming isda. Di ba, pagbaba niyo makikita niyo jan (sa baybayon) marami pong isda,” matod ni Cruz.

“Kami po mga taga Maynila hindi pa kami natatakot eh we trust our LGU is doing their best in taking care of the community,” dugang niya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph