KARONG semanaha sa usa ka mall sa Mandaue City ko magtambayan isip tindero. Apil ko sa mga gitawag og exhibitors, o vendors, sa ilang Sinulog bazaar.
Mga kapin usa ka dosena mi nga mga gagmayng negosyante ang nagtapok dinhi sa ground floor sa Parkmall aron mamaligya og mga discounted item.
Apan dili ang akong tindahan og T-shirt ang atong hisgotan dinhi. Ang atong hisgotan mao ang tindahan nga nakapwesto atubangan sa akong tindahan.
Inig sulod pa lang nimo sa mall agi sa ilang back entrance, imo dayong mabantayan ang tindahan kay kini ra ang booth nga ang nagbantay naka-uniform nga morag mga polis.
Ug tuod man, di layo ang akong pangagpas kay ang mga babaye nga naninda dinhi mga jail guards diay gikan sa Bureau of Jail Management and Penology (BJMP) 7. Ug ang ilang gipamaligya mga item nga binuhat sa mga piniriso sa lain-laing prisohan sa Region 7.
Kasagaran sa mga display mga ladies bag, mga coin purse, mga pouch, mga pitaka, mga plastic nga bouquet, mga decorative item, ug aduna say pipila ka painting sa dagway ni Hesus ug sa mga santos.
Nindot pagkabuhat ang mga item, pulido, daw gama sa mga professional nga mga artist. Ang nakahimo nila nga mas attractive kumpara sa uban mao nga ginama sila sa mga piniriso.
“Hala no? Mga piniriso nagbuhat ani?” matod pa sa usa nga misusi sa tindahan. Mangangha ka. Di ka katuo. Sa iningles pa, ma-amaze. Dayon matandog.
Ngano man ni? Tungod ni sa contrast nga naglihok dinhi--contrast sa mga imahe nga nasilsil na sa atong utok. Kini ang nagsumpaki nga mga imahe sa kalaksot ug sa katahom, sa kangil-ad ug sa kaanyag, sa kangitngit ug sa kahayag.
Nakatatak na sa atong utok ang imahe sa prisohan isip usa ka lugar nga angayng likayan kay dinhi nagtapok ang labing salawayon sa katilingban, sila nga gikuhaan sa katungod sa pagpuyo nga gawasnon uban natong matumanon kunohay sa balaod.
Sa pikas bahin, nakatatak na sab sa atong utok ang imahe sa art isip butang nga iya lang sa katahom ug gama nila nga may mamugmaon, gawasnon ug maanyag nga kalag. Wala makondisyon ang atong utok sa pagdawat ining duha ka managsumpaki nga imahe sa art isip gama sa katahom ug sa piniriso isip sinalikway sa katilingban.
Mao niy nakahimong unique sa mga item nga gibaligya sa maong tindahan, nga ang halin, matod pa sa mga jail guard nga nagbantay, padung tanan sa bulsa sa mga piniriso nga naggama niini.
“Bahalag di ka mopalit ining akong mga T-shirt ma’am basta kanang atbang paliti lang,” akong giingnan ang usa ka customer nga way napilian sa akong baligya, dayong tudlo sa usa ka painting sa santos sa atbang nga tindahan.
“Kinsa nang santosa?” nangutana ang customer.
“Si San Maximiliano, ang patron sa mga piniriso,” mitubag ko.
Ug iyang gipalit ang painting. Nalipay ko. May usa ka piniriso na karon ang may paaboton nga usa ka libo.