LAYO pa ang eleksiyon ug gani sa wala pa magsugod ang opisyal nga kampanya alang sa mga modagan sa pagka-senador ug lokal nga posisyon.
Apan karon aduna nay mga pangalan nga misibaw sa mga surveys. Nobiyenta ka adlaw o tulo ka buwan ang gihatag nga campaign period alang sa mga magpapili sa pagka-senador ug mga partylist groups. Ug 45 ka adlaw ang gitagana sa mga local candidates apil na ang pagka-kongresista.
Nagsugod na ang election period niadtong Dominggo diin molanat kini og unom ka buwan. Daghan na ang gidili karon nga election period na sama sa pagdala og armas de fuego gawas sa panimalay bisan kon adunay permit to carry outside of residence. Gawas kon aduna siyay exemption sa Commission on Elections (Comelec).
Base sa survey sa Pulse Asia nga gipahigayon niadtong Disyembre 14-21, ang nag-una mao sila si Grace Poe; Cynthia Villar, Sonny Angara, Pia Cayetano, Lito Lapid, Nancy Binay, Koko Pimentel, Serge Osmena III, Bong Revilla, Imee Marcos, Jinggoy Estrada, Bato Dela Rosa, Mar Roxas, JV Ejercito, Bam Aquino ug Bong Go.
Base ning maong resulta sa survey, makaingon gyud ta nga kining ubang mga botante wala maghuna-huna labi pa sa background og performance sa mga pulitiko nga ilang butuhan. Ang uban siguro ilang gibase ang ilang preference o nagustuhan pinasikad sa popularity. Aw, hinuon, ila man na nga desisyon. Pero nagpili man god ta og mga opisyal nga mopanday og balaod.
Tiaw ba nimo nang misulod gihapon sa magic 12 si kanhi senador Lito Lapid. Unsa may nahimo ni Lito sa dihang milingkod siya isip senador sulod sa pipila ka termino? Unya si kanhi senador
Bong Revilla nga bag-o lang napriso apan hinuon na-absuwelto sa kasong plunder. Motuo kaha mo nga dili sad-an og wala maka-kuwarta si Bong niadtong kasong iyang gi-atubang? Unya mao nay pilion ninyo og balik? Mao gihapon si Jinggoy Estrada nga aduna poy kasong plunder. Naunsa naman tawon ning mga botante uy?! (bobbygnalzaro@gmail.com)