Delos Reyes: Walay ngipon sa pagpatuman

“Kulang og tawo ang among buhatan.”

GIKATAKDA sa buhatan sa Commission on Elections (Comelec) ang pagpahigayon sa midterm elections sa Mayo 13, 2019. Gani man gisugdan na pag-implementar sa kapulisan ang ilang mga checkpoints kay nagsuhid na ang pag-implementar sa gun ban sa tibuok nasud.

Sa akong yanong panglantaw, mao ra ni ang balaod panahon sa eleksiyon nga mapatuman sa Comelec tungod nalambigit man ang Philippine National Police sa gimbuhaton kay pulis ang nagapatuman sa maong balaod.

Sa laing bahin, nahimong inutil ang Comelec kalabot sa pagpatuman sa pagsugod sa pagpangampanya sa mga kandidato kay sumala sa ilang gipagula nga mando sa Pebrero 12 pa magsugod ang kampanya alang sa mga modagan pagka-senador ug ang mga partylist.

Sa lokal nga mga kandidato, Marso 29 pa ang gitakda nga petsa sa pagsugod sa kampanya apan karon pa lang makita na ang mga buot magpapili diha sa ilang mga tarpaulin nga gipangbitay ug gipangdikit sa mga bungbong sa mga gambalay ug mga kural daplin sa kadalanan.

Naa pay gipamutang nga sakop kuno sila sa Team Pagbabago.

Walay kausaban ug kalahian sa gawi sa mga bentahusong mga kandidato nga buot mahimong solugoon kay moserbisyo lagi kuno sa katawhan.

Mao ning mga ginaingon nga nag-una-una nga mahimong mga law maker apan unsay mamahimong ngipon sa inyong buot ipatuman sa katawhan kon kamo mismo mga masinupakon man sa balaod?

Dunay mga nagbuntaog nga mga higanteng propaganda makita sa dakbayan aron ipahibalo ang inyong kaugalingon ug partido, gihimo ninyong tanga ang katawhan sa inyong ginabuhat samtang ang Comelec way nahimong aksiyon kay ultimo ang mga kaso nga gipasang-at sa inyong buhatan wala man gani maresolba hinay pa sa kuhol ang inyong paglihok.

Alam na besh unsay inyong katarungan kay gamay pa kong bata hangtud karon nga puti na ang akong buhok mao lang gihapon ang katarungan nga “Kulang og tawo ang among buhatan.”

Karon, kinsa mang pribadong tawo gawas sa kaatbang sa mga kandidato ang ganahan moreport sa mga kalapasan nga makita nga wa may mapaabot nga aksiyon ang inyong huhatan?

Unsa man ang inyong ikasaad aron limpyuhon ug bag-uhon ang binuhatan sa mga trapo sa natad sa politika kay kamo man kaha ang gamhanan karon nga panahon?

Sa katawhan nga sa makausa pa haring lungsod na sab kon tawagon, unsa sab ang atong ikatampo alang sa kausaban sa atong nasud karon nga ihatag na sab ang katungod pagpili sa mga moserbisyo ug molingkod sa puwesto?

Eleksiyon na ba ang sulbad sa atong sitwasiyon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph