MAGUINDANAO PROVINCE -- Duha ka mga miyembro sa Bangsamoro Islamic Freedom Fighters (BIFF) ang napatay atol sa panag-engkuwentro tali sa militar alas 3:40 sa kaadlawon kagahapon, Enero 16.
Mga napatay giingong ilawom sa pagdumala ni Kumander Salahudin Hassan sa BIFF.
Sa taho gikan sa 601st Brigade sa Philippine Army, nasayran nga nagpatrolya ang mga ginsakpan sa 40th Infantry Battalion sa Barangay Inaladan, Shariff Saydona Mustapha sa nahisgutang probinsiya.
Apan ilang nasugatan ug na-engkuwentro ang gibana-bana nga 20 ka BIFF nga milungtad ngadto sa 30 minutos una miatras paingon sa Liguasan Delta.
Giingong wala makaaguwanta ang mga BIFF human nga gibombahan sa mga sundalo gamit ang 81 mm mortar ug 90 rr bazooka.
Wala hinuoy gitaho nga naangol o napatay sa bahin sa mga sundalo apan di masukod ang gibating kahadlok sa mga molupyo nga nakadungog sa dagkong mga buto sa kanyon.
Narekober sa mga sundalo sa lugar nga gi-puwestohan sa BIFF ang tulo ka M14 rifles, usa ka A18 Armalite rifle, mga kagamitan sa paggama og bomba, lakip na mga bala. (Edgar E. Fuerzas)