MIDSAYAP, North Cotabato -- Tungod sa panaglalis sa away sa yuta, patay ang usa ka bana samtang naangol ang asawa human gipamusil alas 9:05 sa gabii niadtong Martes, Enero 15.
Giila ang namatay nga si Joel Hernane, 37, samtang samdan ang iyang asawa nga si Melba, 39, mga nagpuyo sa Sitio Bobonao, Barangay Agriculture, Midsayap.
Sumala kang Midsayap Chief of Police, Superintendent Joan Maganto nga samtang nag-inom ang mga biktima ug mga suspek nga mag-amahan nga sila Alder Flauta, 30, ug si Ador Flauta, 64.
Apan sa diha nga nangahubog na, kalit lang nagkalalis sa daang bingkil sa yuta nga giugmad.
Kalit lang mihulbot og kalibre .45 ang mag-amahan diin ilang gipamusil ang magtiayon.
Abtik nga miikyas si Alder samtang nadakpan sa mga miyembro sa Barangay Peacekeeping Action Team si Ador.
Gitakda nga pasakaan og kaso ang mga suspek. (Edgar E. Fuerzas)