SA PAGSUGOD sa election period niadtong Enero 13 ning tuiga, mokabat sa 67 ka mga personahe sa kapulisan sa Davao City Police Office (DCPO) nga dunay kabanay nga mikandidato karong eleksyon ang gipangbalhin gikan sa ilang kasamtangan nga gidestinohan.
Sumala ni Chief Inspector Jason Baria, ang tigpamaba sa kapulisan sa Davao Region, nga ang pagbalhin kanila ang nasubay sa kamandoan sa Commission on Elections (Comelec).
Kini aron nga maseguro nga dili nila magamit ang ilang posisyon aron maimpluwensyahan ang resulta sa eleksyon sa lugar kon diin dunay mikandidato nga ilang paryente o kabanay.
Basi sa talaan sa kapulisan nga ang mga naapektuhan mao ang usa ka chief inspector, duha ka senior inspector, usa ka inspector, upat ka nagranggo og SPO4, upat ka SPO3, unom ka SPO2, katrose ka PO3, katorse ka PO2 ug dose ka PO1.
Ang pagbalhin ngadto kanila ang temporaryo lamang pwede sila makabalik sa lugar nga kanhi nilang gidestinohan pagkahuman sa eleksyon. (Richy F. Nalagon)