PALUTSON unta sa usa ka babaye ang 25 gramos nga gituohang shabu ngari sa dakbayan sa Davao, apan sayong buntag Miyerkules, Enero 16, nadakpan kini sa checkpoint sa Task Force Davao sa Barangay Lacson Calinan District ning siyudad.
Giila ang dinakpan nga usa ka alyas Neneng, (tinuod nga pangalan gitago sanglit wa pa mapasaka ang kaso), 37, ug residente sa Malutlut, Marawi City.
Sumala sa Philippine Drug Enforcement Agency (PDEA)-Davao Region nga sakay sa pasaheroang van ang suspek pasulod sa dakbayan sa Davao, dihang pag-abot sa checkpoint sa TF-Davao nadiskubrehan ang dala niini ang lima ka dagkong pakite sa gituohang sa shabu nga dunay street value nga P375,000.
Nasayran nga dugay na nga gina-monitor sa otoridad ang lihok sa suspek, ug ginakonsidera kini nga numero uno nga drug trafficker sa Marawi.
Sa kasamtangan, priso karon ang dinakpan sa selda sa PDEA ug nakatakdang pasakaan og tukmang kaso. (Richy F. Nalagon)