NAGDASOK na ang mga piniriso sa Davao City Jail sa Maa, human matala ang pagtaas nga 557 percent nga midugang sa daan niini nga ihap.
Subay sa datus gikan Enero 15, 2019 anaa na sa 3,022 ang ihap sa mga piniriso nga makonsidera nga kinahanglan na og kasulbaran sa problema.
Sumala ni Jail Chief Inspector Presco Manisan, ang bag-ong jail warden sa Davao City Jail, nga midugang sa maong ihap ang 77 percent nga piniriso nga sagad drug-related cases.
Gisaysay sa opisyal nga sa normal nga prisohan, anaa lamang sa 460 inmates ang kinahanglan ibutang, apan karon nagkataas gumikan sa gipakusgan nga kampanya sa gobyerno sa pagbatok sa ilegal nga druga diin sa kasamtangan anaa na sa 2,343 drug cases ang anaa sa City Jail.
Giingon sa opisyal nga ilang gipaningkamutan ang pagpatuman sa “plea bargaining framework” diin ang mga nasikop ubos sa gamay nga ebidensya sa shabu, marijuana, ug ubang illegal drugs maka-avail sa new Supreme Court ruling sa “plead guilty” aron makubsan ang jail sentences ug ang paghatag og silot.
Subay sa rekord, dunay 623 piniriso ang mi-apply karon sa framework sukad sa miaging tuig nga dunay 106 piniriso with drug cases ang na-released na ubos sa maong programa.
Gitan-aw sa mga opisyal sa Davao City Jail nga kini ang mamahimong tubag aron makubsan ang pagdasok sa mga piniriso nga maoy hinungdan sa ilang pagsakit sa sulod.
“Ito yong mga drug cases natin ang maka plea bargain. Aaminin ang kaso, so lesser degree ang ibibigay sa kanilang parusa,” ingon sa opisyal atol sa AFP-PNP press conference, Miyerkules, Enero 16.
Karong tuig 2020, buksan na ang state-of-the-art jail facility sa Barangay Wangan, Calinan, Davao City nga dunay badget nga P369 million nga makatabang sab sa pagluag sa mga selda sa City jail.