MOABOT ngadto sa 10 ka kanhi magduduwa sa Cebu Schools Athletic Foundation Inc. (CESAFI) nga gipangulohan ni Rey Suerte ang napili sa Philippine Basketball Association (PBA) D-League rookie drafting niadtong Martes sa kaulohan.
Si Suerte, kinsa produkto sa University of the Visayas (UV) Green Lancers ug kanhi Cesafi MVP, gikuha sa Che’Lu Bar and Grill isip 4th round pick sa 3rd round.
Ang kanhi sab magduduwa sa Green Lancers nga nitapon sa De La Salle University (DLSU) Green Archers nga si Leonard Santillan mao ang nakapuwesto og labing taas sa tanang gikan sa Cesafi.
Si Santillan napiling No.2 overall pick sa Marinerong Pilipino sunod ni Asean Basketball League (ABL) mainstay Joshua Munzon, kinsa maoy No.1 overall pick sa AMA Online Education.
Ang Che’Lu mikuha sab sa laing mga produkto sa Cesafi nga sila si William McAloney (USC Warriors) sa second round, Victor Nuñez (USJ-R Jaguars), John Reel Saycon (USC Warriors) ug Jasper Parker (SWU Cobras).
Sila si McAloney ug Nuñez pulos kasamtangang nagduwa ug sinaligan sa Cebu City Sharks sa Maharlika Pilipinas Basketball League (MPBL).
Ang ubang gikan sa Cesafi nga nangapili mao sila si ex-Jaguar RJ Dinolan sa Trinity, ex-UV Baby Lancer Orlan Wamar sa Marinerong Pilipino, ex Sacred Heart School-Ateneo de Cebu player Rev Diputado sa McDavid ug ex-UV Lancer Jun Manzo sa Dilliman College.
Sa mga nangahisgutan, gilauman nga mohimo dayon og langas sila si Santilan ug Manzo gumikan sa ilang kasinatian sa pagduwa og torneyo sa Manila. EKA, ESL