GOBERNADOR Hilario Davide III subling nipadayag sa iyang suporta sa mga habal-habal.
Iya ning reaksyon sa committee hearing sa Ubos Balay Balauranan labot sa regulasyon o paghimong legal sa motorcycle-for-hire.
Matod ni Davide, gamit ang mga motorsiklo di lamang sa mga siyudad, lakip na sa kalungsuran sa Sugbo.
Suportado ni Davide ang tinguha nga himuong legal ang operasyon sa mga habal-habal lukop nasud.
Ang Ubos Balay Balauranan nihimo og hearing labot niini.
Si Cebu City Mayor Osmeña subli usab nga niatubang sa mga kongresista.
Ang mayor, kinsa kaalyado ni Davide, nipadayag nga mahugno ang ekonomiya sa Sugbo kon di itugot ang regulasyon sa mga habalhabal.
Matod ni Davide, daghan ang mga tawo nga nagsalig sa maong matang sa transportasyon.
Gani sa bukiran ug hilit nga dapit sa probinsiya sa Sugbo, mao kini ang dali nga kasakyan.
“The need for habal-habal, nakita man gyud na nato. We see that even in the towns here in Cebu, that people are dependent on it. There are manyinterior roads even barangays roads nga dili accessible by four-wheeled vehicles. Luoy pud tawon kaayo ang mga bata ug wala sila’y masakyan,” sigun sa gobernador.
Aron pag-regulate sa operasyon sa habal-habal, gisugyot ni Davide nga istriktuhon ang requirements nga kinahanglan alang niini.
Kinahanglang maklaro sab sa balaod kon kinsa ang manubag kon dunay mahitabo nga disgrasya.
Dugang ni Davide, mas maayo nga ma-regulate ang gidaghanon sa mga motorsiklo nga mao lay tugotan nga maka-operate og habal-habal.
“Istriktohan lang gyud ang requirements. That’s why i-regulate gyud. Importante nga naay law to regulate that,” niingon si Davide. AZLG