DI tinuod nga usa ray tag-iya sa tulo ka mga kompaniya nga moapil sa bidding sa P232.5 milyones para pagpalit og 21 ka garbage compactor trucks sa dakbayan sa Sugbo.
Kini ang gibutyag ni Ronald Malacora, pangulo sa Department of General Services (DGS) ug chairman sa Bids and Awards Committee ( BAC).
Si Malacora nagkanayon nga ang tag-iya sa RDAK Transport Equipment Inc. mao si Ricaredo Delfin Abellanosa King, kinsa nakabase sa Cebu.
Ang Hyundai nakabase sa Cebu, apan giubanan sa ilang head office sa Manila. Ang Hino Motors nga usa sa tulo ka bidders nakabase sa Manila.
Gani atol sa ilang pre-bid conference, nihangyo sila nga kon sila ang modaog, ang rehistrasyon sa mga ekipo adto sa National Capital Region.
Gisalikway ni Malacora ang mga taho nga gipanag-iya ni ABC President Franklyn Ong, kapitan sa Barangay Kasambagan, ang tulo ka mga kompaniya.
“Di ko kasulti ana nga usa ray tag-iya kay mismo ang RDAK, kaila man gud ko. King man gud na siya. Ambot og duna ba siyay share pero sa unang panahon, kontra man nang Pamocor (kompaniya ni Ong) ug RDAK. Unya karon nganong ma usa ra man?,” paghulagway ni Malacora.
Siya nisugyot nga labing maayo susihon ang mga registration sa Securities and Exchange Commission (SEC) alang niadtong adunay katahap.
Gitug-an sa BAC chairman nga kaniadto, ang Pamocor authorized dealer sa Hino Motors, apan iyang giklaro nga ang ilang head office ang niapil.
“Kining Hyundai ug Hino mga Manila based gyud ni sila. Ang Hyundai, Cebu siya pero gi-back-apan sa head office nila,” dugang ni Malacora.
Ang bidding proper ipahigayon karong Enero 22 sa Cebu City Hall.
Ang winning bidder gihatagan og 120 ka adlaw sa pag-deliver sa mga unit sanglit di na mangabang ang siyudad og compactor truck para pagkolekta og basura ining Hulyo 1.
Sa maong paagi, gipadayag ni Malacora nga makadaginot ang City Government diin sa miaging tuig, nigasto ang City Hall og kapin o kulang P400 milyones paghipos ug paglabay sa basura.