ADUNAY 58 ka container vans nga gipang-instalar dapit sa Compania Maritima nga gitawag og Devotee City alang sa mga deboto nga gikan sa nagkalainlaing probinsya nga gustong motambong sa Sinulog 2019 apan walay kapuy-an sa dakbayan.
Matod ni Janis Redulla, executive assistant sa Department of Public Service (DPS), nga nakig-uban sila sa gobyerno sa probinsya alang sa pagdumala sa niining Devotee City.
Pangulohan sa Department of Manpower Development and Placement (DMDP) ang registration sa mga deboto nga mopuyo sa maong Devotee City diin gitabangan sila sa gobyerno sa probinsya. Nagpahigayon sila ug pre-registration sa ilang kaugalingon barangay ug kung kinsa ang naka pa pre-registration na, diritso na ang among deboto sa registration area.
Dunay requirements ang pagpuyo sa Devotee City sama sa pagpakita sa bus tickets. Kinahanglan nga ang maong bus ticket nagagikan sugod sa Carcar paingon sa habagatan sa Sugbo ug naggikan sugod sa Danao ngadto sa amihanan sa Sugbo, lakip ang gikan sa mga isla sa Kabisay-an.
Aduna mga gipang-hire ang gobyerno sa probinsya nga house parents diin mao ang mobantay sa mga tagsa-tagsa nga container vans.
Dugang ni Redulla nga anaa sa 40 ngadto sa 50 ka mga tawo ang posibli nga masulod sa usa ka container van tungod ang uban deboto igo lang magbilin sa ilang mga butang ug molakaw na.
“Most probably 40 to 50 siguro ang atong ipasulod. Usually man gyud, di man gyud na sila mostay, igo ra na sila ibutang ang ilang mga gamit pero mang gawas ra gyud na sila. Kasagaran rasad ana matog kay ang mga bata, kasagaran sad sa mga lalaki kay sa gawas rasad na sila kay mamaligya man na sila,” pasabot niya.
Sumala niya nga kung di maigo ang mga deboto nga mopuyo sa Devotee City tungod sa minus nga mga container vans karon tuiga, aduna silang giamdam nga mga tents nga pwedeng magamit sa mga deboto.
Saysay ni Redulla nga di angay mabalaka ang mga deboto nga mopuyo sa Devotee City sanglit aduna silay mga gipangkatap nga mga kapulisan para motabang ug siguradohon ang kaluwasan sa maong lugar.
Aduna usab silay mga house rules nga gi implementar ug kini kinahanglan sundon sa mga deboto nga mamuyo sa maong Devotee City. Ila ning ikatap sa maong lugar aron ang mga deboto makamatngon sa angay buhaton.
Miingon usab si Redulla nga aduna silay mga gipang-instalar nga mga portalets.
Magsugod ang registration karong Biyernes, Enero 18, ug sa parehong adlaw nga ablihan ang maong Devotee City. (Jolissa Mae Taboada, USJ-R Intern)