MGA empleyado sa Kapitolyo hugot nga gipahimangnuan nga dili magapil-apil sa politika taliwala sa nagkaduol nga piniliay sa buwan sa Mayo.
Si Gob. Hilario Davide III miingon nga manubag sa balaod kadtong mga empleyado nga mangampaniya alang ni bisan kinsang kandidato.
Dugang niya, kung buot mangampaniya sa mga kawani, mas maayong mo-resign kini sa katungdanan o kaha moduso og leave of absence sa trabaho.
Hugot nga gidili sa Civil Service Commission (CSC) alang sa mga kawani sa gobiyerno ang electioneering o aktibo nga pagsalmot sa kampaniya sa piniliay.
Subay niini, gipasidan-an ni Gob. Davide ang mga empleyado sa provincial government, ilabi na ang mga regular ug kaswal, nga dili magapil-apil sa politika karon nga nagkaduol ang eleksiyon.
Matod sa gobernador, gamiton niya ang balaod batok kanila kung sila mopugos sa pagpangampaniya alang ni bisan kinsang kandidato.
Dugang niya, angayang itugyan lang sa mga empleyado sa hisgutanan sa politika ngadto sa mga politiko nga sama kaniya, sa bise gobernador ug sa mga board member.
“Mahibaw-an man na. Naa man ang Civil Service, very strict about government employees nga mag-electioneering. So we will use the law againts them. Kanang JOs sayon raman tangtangon ang Jos kay wa man sila’y security of tenure,” niingon si Davide.
Kung buot gyud nga mangampaniya sa mga empleyado, gitumbok ni Davide nga angayang moundang na sila sa ilang pagpanerbisyo o moduso og leave sa ilang trabaho.
Kahinumdoman nga dunay mga job-order employee sa pipila ka mga board member ang wala na gi-renew ni Davide tungod kay gilantawan niya nga dili kini maka-alagad ug insakto sa provincial government kay nidapig na kini sa personal ug politikanhong agenda sa mga bokal.
Giklaro sa gobernador nga nanobra na ang ihap sa mga kawani sa mga board member busa wala na sila gi-renew.
Giklaro niya nga dili pamolitika ang sa non-renewal sa pipila ka mga kawani.
“I told them ‘if you want to campaign ug katol gyud inyong tiil, gusto mo mangampaniya, either you resign or.." matod ni Davide. AZLG