IPAHIGAYON sa Commission on Election (Comelec) ang mock election sa duha ka barangay sa amihanang distrito sa dakbayan sa Sugbo para masusi kon mogana ba ang ilang bag-ong kahimanan para sa May 13, mid-term elections.
Lakip sa ilang suwayan mao ang pag-transmit sa election result ngadto ilang head office ug labaw sa tanan ang sayon nga pag-ila sa botante gamit ang voter registration verification system(VRVS) nga sama sa usa ka tablet.
Si Atty. Marchel Sarno, election officer sa Cebu City North district nagkanayon nga napilian sa ilang Central Office ang Barangay Mabolo sa urban ug Lusaran nga labing layong barangay sa bukid.
Gamit ang kumagko, mailhan dayon ang usa ka botante sanglit mogawas ang iyang biometrics uban sa iyang hulagway ug sa samang paagi, mawagtang ang tikas sanglit gipadayag ni Sarno nga posible adunay mopahimulos sa dayong human sa voting labi na kon ang mga voter nga wa kaboto walay picture( mangilad ug magpa-karon ingnon).
Adunay tag 100 ka botante ang pasuwayon og boto sa matag barangay nga magsugod alas 6:00 sa butang hangtod alas 12:00 sa udto karong Sabado.
Matod sa election officer sa north district nga gipapili nila ang kapitan sa duha ka barangay para sa mga botante nga maoy mosuway og boto.
Giklaro ni Sarno nga dugang ekipo lang ang VRVS para mapadai ang election sanglit sa naandan, ang botante pa ang papangitaon sa ilang polling precinct number, ug moukay pa sa lista sa voters list.
Ang VRVS gamiton sa election karong Mayo sa Cebu sanglit napili kini nga pilot teating uban sa pipila ka lugar sa nasod ug kon masuta nga epektibo, hayan ang Comelex mopalit og dugang VRVS para sa2022 Presidential Elections. PAC