GISUSI sa Department of Environment and Natural Resources (DENR) 7 ang giingong medical waste nga napalgan sa lungsod sa Sibonga.
Kagahapon gikompirmar mismo sa regional director sa DENR 7, Gilbert Gonzales, nga nagpadala na sila og team nga nisusi niini.
Gikatakda karong semanaha mahibaw-an ang hospital ug treatment service facility nga nalambigit sa laing kontrobersiya.
Samtang human nirekomendar ang Environmental Management Bureau (EMB) 7 sa suspensyon sa Treatment, Storage, and Disposal (TSD) Registration sa Davao City Environmental Care, Inc., aduna’y laing accredited service provider nga girekomendar sa ahensiya nga makontrata sa mga hospital.
Nagsugod niadtong Martes, Enero 15, ang Aquilini Mactan Renewable Energy, Inc., nga anaa mahimutang sa Cebu Light Industrial Park, Basak, Lapu-Lapu City, sa pagkuha sa medical waste.
Ang AMREI, mamahimo nga makaproseso og medical nga hugaw nga moabot sa 75 tonelada matag adlaw.
Anaa lang sa 15 tonelada sa medical waste ang matapok sa mga tambalanan lukop Metro Cebu.
Proseso
Gipasabot ni EMB 7 Regional Director Engr. William Cuñado nga ang usa ka medical waste sa tambalanan moagi sa storage facility o Material Recovery Facility (MRF) sa tambalanan sa di pa i-autoclave.
Ang autoclave susama og pressure cooker, patyon ang mga kagaw nga anaa sa medical waste.
Dayon isulod kini sa yellow plastic bag nga mao ang ilhanan nga ang maong basura usa ka infectuos medical waste.
Diha na mosulod ang responsibilidad sa usa ka tambalanan sa pag-track sa iyang medical waste, subay sa Republic Act 6969 o ang “Toxic Substances and Hazardous and Nuclear Wastes Control Act of 1990.”
Matod ni Atty. Unalee Monares, legal division chief sa EMB 7, nga wa pa nila napahamtang ang multa sa kalapasan sa mga hospital ug sa DCECI tungod kay gihatagan pa kini nila og 15 ka adlaw sa pagtubag.
“Wala pa gyud me nag impose ana nga penalties, considering pending resolution pa. Nangayo pa man sila og 15 days to submit sa ilang position paper. After the lapse of the 15 day period, i-resolve na namo ang kaso.”
Mamasurahay
Giklaro usab sa DCECI pinaagi sa ilang opisyal nga explanation sa notice of violation sa Mandaue City kanila nga di ilaha ang basura nga anaa sa Sitio Tambis, Barangay Umapad, Mandaue.
Matod sa tubag sa DCECI nga iya sa mga basurero ang mga basura nga anaa kilid sa Butuanon River nga iya sa usa ka kompaniya.
“The wastes that your personnel found on this vacant lot during their inspection belongs to a group of scavengers who clean and dry the recyclables and reusables they gather from their sources on this vacant lot along the Butuanon river,” matod sa suwat.
Dugang nila nga panginabuhi kini sa mga basurero ug di sila gusto nga kuhaan og panginabuhi.
“This is their livelihood that we don’t intend to disturb on what they do, neither do we have the authority to prevent or stop them,” tipik sa explanation nga gi-address ngadto kang Mandaue City Mayor Luigi Quisumbing.
Hinuon padayon sila nga motabang sa mga basurero aron malimpyohan ang dapit.