KON pananglitan zero visibility na Ang kadagatan sa Mactan Channel tungod sa gipanglantawan nga bati nga panahon sa Sabado tungod sa low pressure area, way mahitabo nga seaborne procession.
Mao kini ang gipahibawo sa Philippine Coast Guard (PCG) 7 isip pagpangandam sa seguridad sa mga tawo nga moapil niini.
Ang Philippine Atmospheric Geophysical Astronomical Services Administration (Pagasa) nag-monitor sa usa ka LPA.
Kon mahimo kining bagyo, masinati sa Sugbo ang pag-uwan sugod sa Biyernes, Enero 18.
Matod sa tigpamaba sa PCG 7 Lieutenant Junior Grade Michael John Encina nga usa ni hulga sa seaborne procession kining bati nga panahon.
Hinuon kon di ra makaapekto ang panahon o maayo ang panahon sa Sabado, Enero 19, padayon ang fluvial.
Usa sa plan B sa Coast Guard kon bati ang panahon mao kining di na molahos pa sa Pasil area ang barko nga sakyan sa Sto. Niño.
Dugang ni Encina nga molahos na lang kini sa Pier 1.
“Alas 4 po ng umaga, sarado na po ang Mactan channel. Ano po ang ibig sabihin nun? Wala na pong makakalabas o makakapasok na vessel. So, lahat po nga magpa-participate sa fluvial procession dapat po before 0400H alas 4 ng umaga, nasa loob na po sila ng Mactan Channel,” pasabot ni Encina.
Magsugod ang procession sa kadagatan sa alas 6 sa buntag ug mahuman alas 8 sa buntag.
Nipadala na usab sila og Notice to Mariners kabahin sa wa unay paagion nga sakyanan sa dagat sugod alas 4 sa kaadlawon hangtod alas 8 sa buntag subay gihapon sa procession.
Kini nagpasabot nga way biyahe nianang orasa sa komersyo nga mga biyahe sa dagat gikan ug paingon sa Sugbo.
Niawhag usab si Encina alang sa mga nanag-iya og sakyanang pandagat nga nagplano nga moapil sa prosesyon nga mokuha na kini og permit sa Marina ug magparehistro sa Cebu Coast Guard Station.
Tungod kay kutob karong adlawa, Huwebes, Enero 17, na lang sila manawat og rehistro. HBL