Pagasa: Sinulog 2019 uwanon

CEBU.  Pagsaulog sa Sinulog karong Dominggo, Enero 20,  ulanon matod sa Philippine Atmospheric, Geophysical and Astronomical Services Administration- Mactan. (Hulagway gikan ni Fe Marie Dumaboc)
CEBU. Pagsaulog sa Sinulog karong Dominggo, Enero 20, ulanon matod sa Philippine Atmospheric, Geophysical and Astronomical Services Administration- Mactan. (Hulagway gikan ni Fe Marie Dumaboc)

ULANON ang pagsaluog sa kapistahan ni Señor Sto. Niño karong Dominggo, Enero 20, matod sa Philippine Atmospheric, Geophysical and Astronomical Services Administration (Pagasa)-Mactan.

Gipahimangnoan sa Pagasa ang mga deboto, mananayaw, ug manan-away sa Sinulog Grand Parade nga mangandam na daan sa masinati nga pag-uwan sa halos tibuok adlaw karong Dominggo.

Gipaabot nga madag-umon ang panahon, sugod pa lang Sabado sa hapon o gabii, Enero 19, hangtud na sa Lunes sa buntag, Enero 21.

Gitug-an ni Romeo Aguirre, ang weather specialist sa Pagasa-Mactan, nga tungod kini sa low pressure area (LPA) nga mosulod sa nasud Biyernes sa gabii, Enero 18, o Sabado sa kadlawon, Enero 19.

Diin sa pagsuod sa LPA sa Philippine area of responsibility, matud ni Aguirre, dako ang kahigayunan nga mahimo kini nga usa ka tropical depression, hinungdan nga posible kini mahimong unang bagyo sa nasud ning tuiga, ug tawgon kini nga bagyong Amang.

Ang LPA kasamtangang anaa sa kapin 2 mil kilometro ang gilay-on gikan sa Hinatuan, Surigao del Sur diin aduna lang kini gikusgon nga hangin nga 15 to 30 kilometro matag oras.

Gilantawan nga posible kini nga mosulod sa tunga-tunga nga bahin sa Surigao del Sur o sa Eastern Visayas.

Ang pinisik sa maong bagyo ang sugod na nga masinati Sabado sa hapon o gabii.

Maayo pa nga panahon ang masinati karong Biyernes atol na sa Walk with Mary ug Traslacion, hinuon gipahimangnuan gihapon ang publiko nga mas maayo nga magdala na daan og panangga gikan sa mga taligsik.

Arang-arang nga panahon ra usab ang masinati sa Sabado sayo sa buntag, hinungdan nga way angay nga kabalak-an atol sa pagpahigayon sa fluvial procession.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph