HAIN man diay si Franz Sabalones? Ang atong nasayran nga si Sabalones boluntaryong mitahan sa iyang kaugalingon sa dihang gihinganlan ang iyang igsuon nga nalambigit sa ginadiling drugas. Iyang giangkon nga siya, dili ang iyang igsuon, maoy nagnegosyo og shabu.
Kon mao kana anaa unta siya ubos sa hurisdiksiyon sa Phil. National Police (PNP) didto sa Camp Crame. Apan nganong wa man kahibawo si PRO 7 Director Chief Supt. Debold Sinas kon hain si Franz Sabalones? Wa ba siya pahibaw-a sa iyang mga labaw sa kaulohan kon hain si Sabalones?
Wa ako masayud kon gipasakaan ba og sumbong si Sabalones o gihimo ba kaha siyang asset sa gobiyerno batok sa iyang mga kauban. Dili ako makatuo nga gibuhi-an lang og basta-basta si Sabalones nga wa lang siya imonitor sa iyang mga kalihukan ug nga way kasiguroan ang PNP kon asa kini siya pangitaa kon gikinahanglan.
Nakadawat og impormasyon ang atong kapulisan nga hikit-an si Sabalones dinhi sa Cebu City ug giingon gani nga mibisita kini siya sa San Fernando. Gisugilon sa PNP nga ang nangamaty nga mga bata-bata kaniadto ni Sablones nagpadayon sa pagnegosyo og ginadiling drugas. Wa hinuon sila mosulti kon mibalik ba si Sabalones sa pagka-drug lord.
Unsa man gayud ang tinuod nga nahitabo? Hain man si Sabalones? Gibuhi-an ba siya sa PNP o nakalayas ba siya? Ang katuhoang pagduda mao nga gihimo siyang asset sa PNP aron gukuron ang iyang mga sakop nga nagpadayon sa pagnegosyo og shabu? Tanga na kaayo ang PNP kon wala nila pahimusli ang boluntaryong pag-surrender ni Sabalones alang sa kampanya sa Duterte administration batok sa ginadilng drugas.
• • •
Kining kampanya sa gobiyerno batok sa ginadiling drugas dili magmalampuson kon sayon ra ang pagpasud sa maong kontrabando dinhi sa nasud. Sa pagka-karon ang gibantayan sa Phil. Drug Enforcement Agency (PDEA) ug ubang mga anti-drug forces mao lamang ang Mactan-Cebu International Airport (MCIA) ug ang mga dagkung pier dinhi sa Metro Cebu. Suma sa gisugilon ni Atty. Clarence Paul Oaminal, nga bag-ong gitudlo ni Senate Pres. Tito Sotto nga coordinator sa naglainlaing ahensiya sa gobiyerno batok sa ginadiling drugas, kinahanglang bantayan usab ang mga gagmay nga airport ug mga pantalan. Sayon kaayo alang sa mga pumpboat sa pagpalusot og ginadiling drugas sa nagkalainlaing gagmay nga dunggoanan. Ang mga gagmay nga ayroplano o kaha helicopter sayon kaayong makada og shabu sa mga gagmay nga tugpahanan nga walay nagbantay.
Ang uban magpalusot og ginadiling drugas pinaagi sa paghug sa mga binultong shabu sa kadagatan nga kuhaon lang usab ang mga gisudlan niini sa ilang mga kaabin. Mao kini ang mga hinungdan nganong daghang mga shabu og ubang klaseng ginadiling drugas nga nagbaha dinhi sa Sugbo. Apan kining maong sitwasyon dili lamang dinhi sa Sugbo kon dili sa tibuok nasud. Kini maoy kinahanglang atimanon sa atong mga tinugyanan sa balaud. (mannyrabacal1144@gmail.com)