GUMIKAN kay ang pipila ka mga sakop sa Hunta Probinsiyal wala mobutar sa resolusyon nga maghatag og gahum ni Gob. Hilario Davide III nga mopirma og kontrata tali sa kontraktor sa pagtukod og 20 ka andana nga edipisyo sulod sa Capitol compound, mi-resbak o nanimawos ang gobernador. Wala na niya gi-renew ang kontrata sa mga job order employees nga nadestino sa mga buhatan sa mga board members nga wala mosuporta sa iyang proyekto.
Si Davide motukod og 20 ka andana nga edipisyo sa Capitol compound nga tawgon og Capitol Resource Center nga nagkantidad og P1.3 billion. Ang WT Construction maoy nakadaog sa bidding. Nangayo siya og authority sa PB nga mosulod og kontrata.
Mitiyabaw ang hingtungdang board members nga kanhi kaalyado sa gobernador. Apan human mideklarar ni third district Congresswoman Gwen Garcia nga molansar sa pagka-gobernador, ang maong mga board members mibalhin na sa ilang panag-alyansa ngadto kang Garcia. Daghan ang nasagmuyo sa gihimo ni Davide. Madinumtanon diay siya.
Mao diay ni klase sa iyang pamulitika. Ngano man nga iya mang gi-among ang inosente ug ordinaryong mga empleyado? Unsa may sala sa mga job order employees nga maoy iyang gipahimongtan? Wala silay labot sa desisyon sa ilang mga amo. Igo lang sila nagtrabaho. Kon adunay angayan nga panimaslan sa gobernador, mao ang mga board members.
Gi-angkon ni Bonifer “Bobby” Nacorda, human resource development chief, nga wala na gi-renew ang mga kontrata sa job order employees nga nadestino sa mga board members gumikan sa kakulangon sa budget. Ang priority kuno karon ni Davide mao ang pagpalig-on sa mga district hospitals.
Kon mao kana, nganong ang job order employees lang sa mga board members nga wala mosuporta sa proyekto ni Davide ang wala gi-renew? Gi-renew man lagi ang uban nga naa madestino sa mga board members nga nisuporta sa katukuran sa new building? Dili diay na pamulitika? Pero gi-angkon sa gobernador nga wa niya gi-renew kay wa molaban kaniya ang maong mga empliyado kay adto sa ilang mga amo. Abi na nako og tarung ni si Davide. Labaw man sab diay’ng yabag.