DI na tiaw kining pinatyanay sa lungsod sa San Fernando tungod kay dagkong mga opisyal na sa kagamhanan ang gi-target.
Unang gipatay sa tunga-tunga sa miaging tuig si Konsehal Alexander Alicaway. Sayo ning buwana, gibirahan sa riding in tandem si Konsehal Reneboy Dacalos. Niadtong Miyerkules sa gabii, gi-ambush si Magsico Barangay Captain Johnny Arriesgado.
Sila si Dacalos ug Arriesgado pulos gilambigit sa kapulisan kang self-confessed drug lord Franz Sabalones. Ang nakapait kay ang kapulisan way matumbok nga mga suspek ug nagpaluyo niini. Puro “blank wall” ang ilang mga tubag. Ang naandan nga lusot mao ang drug-related nga anggulo kay kuno, gilambigit sila kang Sabalones.
Apan kutob ra diha ang mga pulis. Sama sa ubang mga kaso, mahatipon ra kini sa case files sa mga krimen nga wa masulbad, giabugan sa ilang mga cabinet.
Standard ang mga tubag sa kapulisan: drugas. Apan wa silay matumbok nga gunman ug kinsay utok. Mao kini ang dugay na nga pangutana sa mga kaso sa pagpatay nga hangtod karon, way manganlan ang kapulisan. Unta, kon dunay motibo, dunay nagplano ug nag-excute.
Dinhi makita ang grabeng kakuwangan sa mga imbestigador sa kapuilisan. Mao usab kini ang rason nga ang publiko nagduda nga state-sponsored kining mao nga mga pagpatay, labina sa init kaayong anti-drug drive sa administrasyong Duterte.
Panahon na karon nga mo-pressure ang local officials sa San Fernando sa pulis sa pagpalawom og maayo sa imbestigasyon aron molutaw kon unsa may motibo, drugas ba o pulitika.
Kon magpakahilom ang incumbent officials sa San Fernando sama sa nangaging mga pagpatay, mahimong madudahan usab silang nag-unay-unay tungod sa pulitika ug gitabunan lang sa isyu sa drugas.