SA tinguha nga mapausbaw og balik ang ilang ranking sa Central Visayas Regional Athletic Association (Cviraa) meet ug sa 2019 Batang Pinoy Visayas Leg, subsob nga pagpangandam ang himuon sa Cebu Province nga sugdan sunod semana sa lungsod sa Carmen, amihanang bahin sa Sugbo.
Ang Cviraa ipahigayon sa dakbayan sa Dumaguete samtang ang 2019 Batang Pinoy Visayas leg adto himuon sa dakbayan sa Ilo-ilo sa Pebrero 23 ngadto sa Marso 2.
Sa niaging tuig, ang Department of Education (DepEd) Cebu Province division nahagsa gikan sa ikaduha ngadto sa ikalima sa Cviraa meet didto sa Bohol.
“Our ranking last year was down, we hope we emulate the delegation’s performance during the Cviraa in City of Naga a few years back where we placed second overall,” matod sa Cebu Provincial Schools division coordinator nga si Nenita Jaralve sa dihang gikahinabi sa SunStar Cebu. “Second place is our aim, we’re not even thinking of the top spot because the meet is really dominated by Cebu City.”
Ang Cebu City Niños maoy overall champion sa Cviraa meet sulod sa niagi nang 26 ka tuig.
Moabot nga dto sa 768 ka mga atleta ug mga coaches ang ipadala sa Cebu Province sa Cviraa meet nga maoy magsilbing qualifying event sa 2019 Palarong Pambansa nga gikatakdang ipahigayon sa dakbayan sa Davao.
Matod ni Jaralve nga mas daghan kini karonh kon itandi sa niaging tuig. Mosalmot sila sa regular ug demo sports competition.
Sa laing bahin, ang Cebu Provincial Sports Commission (CPSC) ang nangandam na usab alang sa Batang Pinoy Visayas Leg, usa ka grassroots sporting event nga giorganisar sa Philippine Sports Commission.
Si CPSC executive director Atty. Ramil Abing mibutyag nga ang Cebu Province mopadala og 300 ka mga atleta sa Iloilo City.
“More or less 370 people in the delegation including the coaches. It’s higher compared to last year. More athletes will get the chance to qualify to the national finals,” matod ni Abing. RSC