Floyd mosaksi sa away ni Pacquiao

KOMPIRMADONG motan-aw si Floyd Mayweather Jr. sa away ni Manny Pacquiao ug Adrien Broner karong Sabado (Dominggo sa Pilipinas) didto sa MGM Grand sa Las Vegas, Nevada.

Kini maoy gikompirmar ni Leonard Ellerbe, ang chief executive officer sa Mayweather Promotions, kinsa mibutyag nga ang undefeated ug kanhi pound-for-pound king mopahiluna sa ringside aron personal nga mosaksi sa maong away.

Tungod niini, mikusog ang hugonhugon nga mahinayon ang gikahinaman nilang rematch ilabi na kon modaog si Pacquiao sa iyang pagpakigsangka ni Broner.

Gani, usa ka tinubdan nga suod sa kampo ni Mayweather ug Pacquiao ang mibutyag nga ang maong rematch posibling mahitabo karong Hulyo.

Unang nabaniog ang maong rematch sa dihang nagkatagbo ang duha didto sa Tokyo, Japan sa usa ka party.

Didto nahitabo ang kinantiyaway ug hagit tali sa duha ka kampo ug didto usab gisugdan ang sabotsabot sa ilang rematch.

Sa niaging semana, gikataho nga subling nagkaabot na usab ang duha atol sa duwa sa Clippers didto sa Los Angeles diin gipahigayon ang usa ka Filipino Heritage Night sa NBA ug si Pacquiao maoy usa sa pinasidunggang dinapit.

Unang nagkaaway ang duha ibabaw sa ring niadtong Hunyo 2015 diin gipildi si Filipino boxing icon pinaagi sa unanimous decision.

Ang maong away mibuak ug mikulit og kasaysayan sa boxing sa tibuok kalibutan diin gihulagway nga maoy pinakadako og kita sa pay-per-view sales ug ingon man sa kita sa gate.

Si Pacquiao, sa iyang bahin, mipadayag nga wala siyay kasayuran kon motan-aw ba diay si Mayweather sa iyang away. JBM

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph