MAHITABO na sa Dominggo, Enero 20, ang 3rd Ateneo de Davao University (Addu) Rapid Individual Chess Tournament sa Addu Jacinto conference room.
Mga magduduwa, sumala sa event post pinaagi sa APM Mindanao Chessmates Facebook page, kinahanglan nga 13 hangtud 23 anyos ug estudyante sa tuig ting-tungha 2018 ug 2019.
Ang registration fee nagkantidad og P150 alang sa dili tinun-an sa Ateneo ug P100 alang sa Ateneo nga magduduwa.
Libreng paniudto ang ihatag ngadto sa mga partisipante sa usa ka adlaw nga torneyo kansang torneyo director mao si Ariel Niño Aton.
Ganting salapi maghuwat sa mga mananaug kon diin ang mokampeyon makabulsa og P1, 200 ug tropeyo samtang ang runner-up mobulsa og P800 ug medalya.
Ang mahiluna sa ikatulong puwesto makakuha og P500 ug medalya samtang ang best female player moangkon og P300 ug medalya.
Alang sa dugang pangutana, kontaka si Aton sa mobile number 0942-4469802.