UBAN sa diyutay na lang nga mga gimbuhaton ug pagpangandam nga han-ayon, mga tigpasiugda mihatag na og “green light” sa paglusad sa 63rd National Private Schools Athletics Association (Prisaa) Games 2019 sa Davao City sa Mayo 19 hangtud 24.
Si National Prisaa president Ma. Lita Montalban, kinsa maoy bisita sa Davao Sportswriters Association (DSA) Forum Huwebes, Enero 17, sa The Annex of SM City Davao, nagdeklara nga, “Everything is set.”
Sumala niya nga ang National Prisaa Board mihimo og coordination meeting uban sa lain pang mga hingtungdang ahensiya niadtong Disyembre 10.
Nagpasiugda sab siya og “reorganization” sa National Prisaa management structure.
“Whoever hosts the National Prisaa Games will run the whole show and all regional Prisaa presidents will be chairpersons of different sports. They will oversee the games para hindi magkaproblema. I myself will be in charge of basketball,” pasalig ni Montalban, kinsa giubanan ni executive secretary Lourdes Mission.
Si Prisaa-Davao Region executive director Joaquin “Boy” Sarabia sa University of Mindanao, sumala kaniya, modumala sa bahin sa teknikal sa national meet. “He is the executive director of the National Prisaa Games.”
Si Montalban, tag-iya ug presidente sa Emar Human and Environmental College, nagsulti sab nga ang Department of Education (Deped) pinaagi ni regional director Alberto Escobarte ug Deped-Davao City superintendent Maria Ines Asuncion, andam na sa pagdumala sa 7,500 ka atleta ug coaches gikan sa 17 nga mosalmot nga rehiyon gikan sa nagkadaiyang pampublikong tulunghaan dinhi.