GIPANGDUGMOK sa Optical Media Board (OMB), uban sa lokal nga awtoridad Huwebes ang kinatibuk-ang 440 nga sako sa mga pinirata nga DVDs ug CDs kantidad og P63 milyon nga nasakmit atol sa ronda sa nagkadaiyang mga tindahan sa dakbayan sa Davao niadtong Septyembre 2018.
Ang dalan gawas sa Davao City Police Office (DCPO) headquarter temporaryong gisirad-an Huwebes, Enero 17 aron nga tagaan og higayon nga ligsan sa tangke ang mga pinirata nga salida ug kanta apil na ang ekipo nga gigamit sa pagprodyus niini.
Sa paghinabi uban ni Abogado Anselmo Adriano, chair and chief executive officer (CEO) sa OMB, ang maong kalihukan mao’y laing paagi sa pagpadala ug pahimangno nga walay pu-as ang ilang kampanya batok sa “piracy.”
Matud niya nga moabot og mga bulan alang kanila una nila kini gidugmok tungod sa kantidad sa nasakmit nga mga butang. Nagpadala sab sila og subpoena ngadto sa mga tag-iya sa mga puwesto apan wala’y bisan usa ang mipatim-aw.
“We want to show the people together with the top brass of PNP here in Davao that we are very serious about our job. We want to warn everyone not to pursue this kind of trade. We’re here to enforce the law. We’re here to protect our film and music industry who have been suffering for so long simply because of piracy,” bahad ni Adriano.
Ilang gihimo ang pagdugmok sa nahisgutang mga butang atubangan sa publiko aron nga mawagtang ang espekulasyon nga human sa operasyon, mobalik ra gihapon kini sa merkado. Human sa ceremonial destruction, gipasalig ni Adriano nga matag CDs dugmokon pa usa-usa una ipadala ngadto sa Manila.
Iya sab nga gipahimangnoan kadtong nagnegosyo og “piracy” nga hunongon na ang ilang iligal nga kalihukan kay nakalapas sila sa Republic Act 9239, nga labing nailhan sab isip Optical Media Act of 2003 nga posibleng ikapriso.
Sulod sa tulo ka tuig, sukad 2016, gipasigarbo ni Adriano nga nakasakmit na sila og kapin P3 bilyon nga kantidad sa pinirata nga mga materyales.
Samtang gipasalig ni DCPO director Police Senior Superintendent Alexander Tagum nga mas hugtan pa nila ang pagtubag sa “piracy” sa siyudad. Matud niya nga maghimo sila og dugang mga operasyon batok sa mga establisyemento nga namaligya niini.