LABING unang Sorbetes Festival sa Sugbo ipahigayon sa Barangay Pahina San Nicolas, dakbayan sa Sugbo karong Dominggo, Enero 20, human sa Sinulog Festival.
Si Ernie Pardillo, nagpakabanang molupyo sa dapit, maoy organizer sa maong festival uban sa iyang co-organizer nga si Antonieta Belandres.
“Kon dunay Siomai Festival sa Tisa ug Buwad Festival sa Taboan, maayong maila usab ang Pahina San Nicolas sa laming ice cream. 1950s pa gud nagsugod ang ubang negosyo sa ice cream diri. Dinhi ang daghang naghimo og ice cream hangtod karon,” matod ni Pardillo.
Dugang ni Pardillo, nag-unang tulo ka mga tighimo og ice cream ang moapil sa festival sama sa Central Ice Cream, Jamin’s Ice Cream ug Jun Bells Ice Cream.
Sa dayong sawop sa adlaw, sugdan ang daghang kalingawan sama sa street dancing sa eskina sa dalan Garfield ug Espelita sa nahisgotang barangay.
Labaw sa tanan, ang tulo ka mga tiggama og ice cream mohatag og libreng pagtilaw sa ilang produkto ngadto sa mga tawo nga motambong sa unang Sorbetes Festival.
Gidapit ang tanan nga human sa Sinulog Festival sa dakbayan, motambong usab sa Sorbetes Festival sa Pahina San Nicolas aron patilaw sa lamiang ice cream sa dapit ug pagpakighiusa sa paghudyaka sa paglahutay sa sorbetes sa barangay.
Si Pardillo malaumon nga mahimo kining tinuig nga kalihokan sa barangay. PR