SUPERBALITA CEBU

“Talá na sa Sinulog...”

NAHINUMDOM ko adtong nagkagubot ang mga netizens sa promo usa ka airline company nga gisugdan sa linya nga “Tala na!” Nag-iyahay og angkon nga sila ang husto ug sayop ang pulong ‘tala’ kay kuno nagpasabot nga may diperensya sa utok.

Hello! Kanang ‘tala na’ diri sa habagatang Sugbo mao nay ‘tana’ sa dakbayan. Mao kini ang gigamit ni Mike Hanopol (o sa nagsulat sa labing unang Sinulog theme song nga Binisaya) nga nagkanayon ‘Tala na sa Sinulog/ Kitang tanan mag-Pit Senyor...’.

Ang unang stanza sa Tagalog version nagkanayon: ‘Tayo na mag-Sinulog/ Tayong lahat mag-Pit Senyor/ Sugod na sa Sinulog/ Tayong lahat mag-Pit Senyor.’

Segurado ko ani kay sa pagpahimo sa mga dakodako sa Sinulog sa 1980s, ang drumbeat sa Southwestern University Dance Troupe ang gibasehan sa himoonong kanta.

Sa dihang nahuman na ang kanta, ang SWUDT usab ang unang gipadungog ug gipasayaw niini. Niingon kong segurado ko kay usa ko sakop sa maong pundok. Dose (12) ka Sinulog Grand Parade ang akong naapilan sa wa pa ko mohukom nga mahimong tighulagway sa kalihukan sa mantalaan ug sa radyo (sa pila ka higayon).

Taym pa. Duna pa kahay kopya sa orihinal nga Sinulog theme song? Mga cover versions na man god sagad ipatokar.

•••

Duna pa gyud gihapoy mga kauban sa buhat labina sa broadcast nga motawag sa grand parade nga mardi gras. Ambot kon sa unsang hinungdan.

Maghuot intawn ang dughan sa pila ka sakop sa Sinulog Foundation kon tawgon og mardi gras ang grand parade kay managlahi man gyud kini. Panahon na tingali nga atong gamiton ang husto.

•••

Sama sa naandan ug sa gipaabot, magkalatà ang mga artista nga moanhi sa Sugbo sa Pista Senyor. Ang mga Kapamilya mao sila si Coco Martin, Yassi Pressman, Lito Lapid, Mark Lapid, ubang sakop sa Vendetta, KZ Tandingan, Maja Salvador ug mga kauban.

Ang mga Kapuso gilangkuban nila ni Dingdong Dantes, Dennis Trillo, Solenn Heussaff, Kyline Alcantara, Therese Malvar, Barbie Fortesa, Mika dela Cruz, Jak Roberto, Paul Salas ug uban pa.

Basin maayo lang mo modugok sa mga lugar diin adto kining mga artista ug malimot ta nga ang labing labaw nga ‘artista,’ si Sr. Sto. Niño, naghulat nato sa Basilica Minore del Sto. Niño.

Ayawg limotlimot diha! Sige ka!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph