GIPAHIBAWO ni Shahlimar Tamano, regional director sa Department of Tourism (DOT) 7, nga dili direktang apektado ang turismo sa Sugbo ug dakbayan sa Lapu-Lapu sa suliran kalabot sa pagdagsa sa hospital wastes sa kadagatan sa dakbayan.
Kini ang pamahayag ni Tamano human usa ka resort sa Brgy. Maribago nga nahinabi ning mantalaan kagahapong adlawa miangkong dunay pipila sa ilang mga guest ang nipa-cancel sa ilang booking gumikan sa balita sa pagdagsa sa hospital wastes sa kadagatan sa dakbayan.
Matod ni Tamano nga nabalaka siya sa epekto niini sa kadugayan kung magpadayon ang maong suliran apan sa pagkakaron wala ra kaayo epekto.
Masaligon si Tamano sa gipahigayon na nga pakisusi sa mga hingtungdang ahensya mahitungod sa posibleng manubag sa pagdagsa sa mga hugaw ug naglaom siya nga adunay mapasakaan og kaso sa maong suliran.
Subling giklaro ni Tamano nga ang mga dapit diin nakit-an ang mga hospital wastes sa kadagatan sa Lapu-Lapu dili ang dapit nga gihulagway sa dakbayan nga swimming area o tourism destination.
Nagpabiling limpyo ang kadagatan sa dakbayan diin sagad naa ang mga dagkong resorts, matod ni Tamano.
Wala pa usab siya makadawat ug reklamo sa mga resorts sa dakbayan nga nihinay ang ilang bookings gumikan sa naasoyng suliran.
“The side were we have tourist is on the opposite side of Mactan, kani nga side (ang apektado) dili ni siya pang swimming area even before mao nay kinahanglan masabtan sa atong mga visitors,” pagpasabot ni Tamano. GCM