GIBANHIGAN patay ang kanhi Cebu City assistant prosecutor Mary Ann Castro sa dan Escario, dakbayan sa Sugbo, Huwebes sa gabii, Enero 17.
Sakay sa iyahang sakyanan nga yellow Nissan Juke, giingong gisugdan pagpusil si Castro, 49, sa may Parklane.
Ang hepe sa Police Station 2 sa Cebu City Police Office Police Senior Insp. Edward Sanchez nikompirmar ni Castro gamit ang driver’s license niini.
Matod ni Sanchez, si Castro paingon sa Capitol area gikan sa Cebu Business Park sa dihang gipusil pasado alas 9.
Sa police spot report, adunay usa ka lalaki nagsakay og motorsiklo ang nipaduol sa sakyanan og mipusil kang Castro.
Si Castro naigo sa wala nga bahin sa liog ug ang bala milusot sa tuo nga bahin sa apapangig hinungdan sa iyang kamatayon.
Si Castro nahimong assistant prosecutor sa Cebu City sulod sa 18 ka tuig bag-o kini mi-resign niadtong Abril 2017.
Si Castro ang kanhi nga asawa ni Leodegreco Sanchez, anak sa anhing Vice Governor Gregorio Sanchez. Ang magtiayon gikasal niadtong 2015 sa usa ka Islamic nga seremonyas apan gipawala'y bisa kini human sa upat ka buwan.
(Alan Tangcawan ug Johanna Marie Bajenting)