ANG pagpasaylo ug wagtangon ang pagdumot, ug ang hugot nga pagtuo ngadto sa Sagrada pamilya ang unod sa wali, isip pahinumdom ngadto sa deboto sa balaang bata ug sa Birhen sa Guadalupe atol sa Traslacion mass sa simbahan sa St. Joseph National Shrine sa dakbayan sa Mandaue.
Gibana-bana sa Mandaue City police nga moabot sa 10 mil ka mga tawo nisaksi ug nisalmot sa traslacion ning tuiga.
“Di lang kita mangandoy alang sa maayong panlawas, mangandoy alang sa atong negusyo, kana bang aduna kitay pangandoy nga ato unta maabot, ang kanang gugma nga magdala og kalinaw, kahusay, paglimpyo sa atong tanglag, pinaagi sa pagpasaylo,” matud ni Monsignor Danilo Sanico.
Ang pagsakripisyo diha sa paglinya og taas, ang maningkamot nga makasimba, ug uban pa nga gihimo nga pagsakripisyo atol sa kapistahan ni Senior Sto. Nino, matud ni Monsignor Danilo Sanico tungod sa pagka ‘Bato balani’ ngadto sa gugma sa Dios. Ug kon nahigugma sa Ginoo, kining gugma magdala ug kalinaw, kahapsay ug maghaw-as sa pagbati nga naghigwaos pinaagi sa pagpasaylo.
Usa sa libuan sa mga nisalmot sa misa Traslacion Byernes sa buntag mao ang kanhi mag-alyado sa pamolitika ug karon nagka-kontra na ang kampo nila ni Mandaue City Mayor Luigi Quisumbing ug Sixth District Representative Jonas Cortes.
Hinuon, bisan pa man taliwala sa tinubagay sa matag kampo tungod sa nagkadaiyang isyu, atol sa pagbinayloay sa mga pulong nga "peace be with you" su’d sa santos nga misa, naghinatagay sa ilang pahiyom ang kampo ni Quisumbing ug Cortes, ug sila mismomg’ duha nga nag-atbang lang og gilingkuran.
“I never hold any grudges in my heart, ang ato lang gyud gibuhat karon ang matarung ang mga nabuhat nga sayop.. Personally, I never had personal issue against Cong. Cortes or any of his allies,” pasabot ni Quisumbing.
Si Quisumbing uban sa iyang asawa nga si Maricar, ang nitagbo ug nidawat sa mga imahen sa Balaang Bata ug sa Birhen sa Guadalupe, human usab nga ang pamilya ni Cebu City Mayor Tomas Osmena, uban ang iyang asawa nga si konsehal Margot Osmena ug anak nga si Miguel, ang niuban sa paghatud sa mga imahen diha sa utlanan Barangay Subangdaku sa Mandaue City ug Mabolo sa Cebu City, uban na usab ang mga pari sa Basilica Minore del Sto. Nino pinanguluhan sa rector nga si Fr. Pacifico Nohara Jr.
Libuan ka mga tawo ang nag-atang sa kilid sa dan apan bisan kon gidili ang mga balloon, anaa gihapon pipila nga nagbitbit.
Hinuon sa kinatibuk-an, gihulagway nga nagmalampuson ang pag-abot sa mga imahen diha sa Mandaue City. Gibana-bana ni Chief Inspector Aldrin Villacampa, ang hepe sa Centro police station diin nahimutang ang simbahan, nga moabot sa 10 mil ang mga nisalmot.
Human sa misa traslacion, abot na sa kalsada ang linya sa mga buot mohikap sa mga imahen, usa na niini ang 73 anyos nga si Elsa Del Castillo, deboto sa balaang bata kinsa niangkon nga maglisud na siya sa pagtuyo sa Basilica aron lang makahalag og padayeg niini. Uban niya sa niantus ug linya ang iyang pamilya, upat sa 11 ka mga anak ug unom sa 15 ka mga apo.
“Nahimo naman nako nga panaad. Maglisud naman ko og adto sa Basilica, moantus gyud ko dire og linya. Kini sila tanan ug kato uban nako anak ug apo, kanunay nako iampo sa Sto. Nino hatagan mi og maayong panlawas gyud,” saysay ni del Castillo ngadto sa Superbalita Cebu.