KADA espisyal nga okasyon, ang mga tagbalay mag-iyahay og hikay og lain-laing putahe para saluhan sa tanan. Ang kataw-anan kay ang ubang gipang-imbitar manala man sab og mga silingan, higala ug kaila nga wa ma-apil sa ihap unya magdala pa gayod og plastic bag para sa ‘bring house’.
Matod sa Read and Digest, dunay mga pagkaong bahaw nga angay likayan sa pagbalik-balik og init kay makadaot kini sa panglawas.
Una kining kan-on. Kasagarang bahaw nga kan-on, kalu-kaluhon para maghimong garlic rice o fried rice. Ang bugas nga kung lung-agon mahimong kan-on dunay mga spore (liso) nga mahimong mapuy-an og mga bacteria. Kung kini ibutang sa init nga lugar, mosamot kadaghan ang spore nga kung makaon maoy maka-ingon sa problema sa tiyan. Kung naa man gali mahabiling linung-ag, isulod dayon kini sa refrigerator para di modaghan ang bacteria.
Utanon. Kining lami nga putahe sama sa Chapsuey nga dunay daghang sagol nga utanon (Cabbage, Spinach, Cauliflower, Carrots, beans of uban pa) dunay taas nga level sa nitrates nga kung ma expose sa init makapaguwa og daghang toxins nga makadaot sa panlawas. Delikado kining maka-ingon sa grabing pangurog, pamati ug tumang kakapoy ug lisod sa pag-ginhawa. Matod sa Center for Food Safety, angay seguradohon nga mabutang ang subrang sud-an nga utanon sa refrigerator aron di ma pan-os.
Manok. Usa kini sa mga paboritong sud-an natong mga Bisdak tungod kay maka hatag man kini og enerhiya sa lawas, daghang sustansiya ug protina. Apan kung init-initon, labi na tong segi og gamit og microwave, ang dala ini nga protina delikado sa atong lawas labi na og molapas na og duha ka adlaw. Busa, seguraduhon nga ang tanang parte sa manok , mainit og insakto, di lang ang gawas o panit ini .
Di kalikayan, duna gyo’y mahabiling bahaw nga mas lami pa kan-on kaysa sa bag-ong luto. Kinahanglang seguraduhon nga luwas kini bisag initon una kan-on para di ang lawas maoy magsakripisyo. Hinumdumi, Health is wealth.