BANSALAN, Davao del Sur -- Usa ka sakop sa Cafgu Active Auxilliary (CAA) ilawom sa 39th Infantry Battalion (IB), Philippine Army gisikop sud sa balay tambalanan banda alas 9:00 sa buntag, Huwebes.
Gihikay sa Bansalan ug Magsaysay Municipal Police Station ang hiniusang operasyon nga miresulta sa pagkasikop sa suspek nga si Jaymar Ecdang alyas George Rafael, 32, minyo ug molupyo sa Purok 6, Brgy. Balnate, Magsaysay.
Si Chief Insp. Rodante Varona, hepe sa Bansalan MPS, nagbutyag nga gisilbi nila ang orden de aresto sa kasong rape samtang ang suspek nagpatambal sud sa Viacrusis Medical Hospital sa Brgy. Poblacion Dos.
Gitataw ni Varona nga gipaguwa sa Regional Trial Court (RTC) Branch 21 ug gilagdaan ni Presiding Judge Loida Posadas-Kahulugan ang warrant of arrest sa asunto ug way piyansa ang girekomenda.
Samtang, si Chief Insp. Ivan Samoraga, hepe sa Magsaysay MPS nagbutyag nga padayon pang gitambalan sud sa tambalanan ang suspek hinungdan nga gibantayan una siya sa kapulisan.
Gidason ni Samoraga nga aktibong CAA ang dinakpan ug nadestino sa Brgy. Tagaytay, Magsaysay sa dihang nahitabo ang pagpanglugos apan wa na niini gibutyag ang detalye sa kaso. (Orlando B. Dinoy)