SUD sa duha ka adlaw nalandig sa tambalanan si Virgie Ramas, taga Brgy. Labangon, siyudad sa Sugbo, gumikan sa taas nga hilanat ug kalibang niadtong Disyembre sa miaging tuig.
Sa iyang kahimtang, nangaliyupo ang 64 anyos nga ginang sa Señor Sto. Niño nga ayuhon siya sa iyang gihambin nga balatian.
Tuod, gidungog ang iyang pag-ampo ug siya naayo. Bugti sa naangkon nga kaayohan sa sakit, siya nisaad nga moapil sa mga kalihukan sa kapistahan sa Señor Sto. Niño.
“Giayo man ko niya, mao nang kada adlaw mosimba gyud ko niya,” sumala ni Ramas.
Siya ang usa sa gibanabanang 350,000 ka mga deboto nga niapil sa penitential Walk with Mary ug Misa Traslacion nga nagsugod alas 4 sa kaadlawon sa Archdiocesan Shrine sa Our Lady of Guadalupe de Cebu sa Barangay Guadalupe, pagka Biyernes, Enero 18.
Sa iyang wali, si Padre Manuel Tan, parish priest sa Archdiocesan Shrine sa Our Lady of Guadalupe de Cebu, niingon nga mawad-an og dignidad ang tawo sa pagpangalagad kon kini kurakot.
Matod niya, ang kurapsyon gikan sa kahiladman sa tawo diin mangguwa ang tanang kahiwian ug kahugawan sama sa pagpanilkil, pagpangawat, pagpanglibak ug adultery.
“If you’re heart is corrupt, you will certainly become a corrupt person in the future. Anha magsugod sa ato,” pamulong ni Tan sa iyang wali sa Misa Traslacion sa Basilica Minore del Sto. Niño human sa Walk with Mary.
Siya nidugang naay mga butang nga nagbuhat ang tawo og sayop ug dili niya kini mahibaw-an hangtod nga way mobadlong niya.
Human sa misa, gisunod ang Traslacion kun ang pagdala sa mga imahen sa Birhen sa Guadalupe ug Señor Sto. Niño ngadto sa National Shrine of St. Joseph, dakbayan sa Mandaue diin matulog kini og usa ka gabii sa dili pa dad-on og balik sa siyudad sa Sugbo pinaagi sa sea-borne procession o fluvial parade.
Samtang, moabot sa 6,000 ka mga pulis, tanod, City of Lapu-Lapu Allied Force CLAF, mga force multiplier ug mga tinun-an ang gikatakdang mosugat sa imahe sa balaang bata Senior Sto Niño sa dakbayan sa Lapu-Lapu sa Traslacion habig sa dakbayan karong adlawa, Enero 19.
Kini gawas sa liboan pa ka mga deboto nga gipaabot nga motambong sa nahisgotang kalihukan.
Ang gidaghanon paigo na para masigurong hapsay ug malinawon ang nahisgotang kalihukan matod sa kapulisan ug sa city government.
Matod ni Senior Supt. Limuel Obon director sa Lapu-Lapu City Police Office LCPO ang mga pulis ug tanod ug ubang force multiplier maoy magsilbing mobarog daplin sa dalan ug sa rota diin moagi ang balaang bata gikan sa Mandaue paingon sa Lapu-Lapu.
Ang uban maoy magbantay sa palibot.
Alas 10:00 pa lang sa gabii nakapwesto na sila sa ilang mga posisyon diha sa habig sa Mandaue-Mactan Bridge.
Ang mga tinun-an nga maoy nagdaghan sa grupo maoy motabang sa pagbarog sa kadalanan paingon sa simbahan sa Shrine sa Virgen dela Regla diin gipahigayon ang santos nga misa sa dili pa ang tinuig nga sea-borne procession.
Pipila usab kanila ang mohalad ug sayaw alang sa balaang bata sa tiilan sa Mandaue-Mactan Brodge habig na sa Lapu-Lapu.
Alas 5 sa kadlawon ang misa sa simbahan o sa pag-abot na sa balaang bata.
Nangayo ug pagsabot ang kapulisan sa mga deboto sa posible unyang mabadlongan sa pagpadaplin sa dalan nga agian sa imahe sa balaang bata sanglit gidili gayud ang pagpaduol niini nga makababag na hinuon sa agianan.
Nanghinaot si Obon nga mosunod lang ang tanan ug di magdinuotay sa prosisyon paingon sa simbahan aron walay disgrasya.
Sama sa Basilica Minore del Sto Niño walay gitugotan ang kapulisan nga makadala ug backpack sa pagsalmot sa kalihukan labi na sud sa simbahan sa Virgen dela Regla. SCG, GCM