SUSAMANG dili pa makatoo ang presidente sa Liga ng mga Barangay human nga giimbitahan ni Presidente Rodrigo Duterte ug gi-endorso atol sa state dinner niadtong Enero 17, sa Malacañang.
Matud ni ABC president Yan Lam “Alam” Lim kinsa nagpapili sa pagka-kongresman ubos sa partido ni Mayor Oscar Moreno sa ikaduhang distrito sa siyudad nga daw hangtod karong panahona susama nga naglutaw pa kini.
“I was not expecting nga mao man diay to ang purpose sa atong Presidente, until karon gani na shocked pa ko nganong nakaadto ko didto sa Malacañang giimbitar lugar ko, ingon siya nga paghuman sa state dinner naglabay sa akong lamesa ingon dayon siya nga paghulat diha kay mobalik ako kay ako kang e-endorse,” matud ni Lim.
Gidugang pa niini nga proud kaayo kini tungod na usab kay gawas kay Christopher “Bong” Go kini ang pinakaunang gi-endorso sa pagka-congressman sa tibuok Pilipinas.
“Kalipay nato nga dako gyud iyang pagsalig kanako kay dili biya tiaw-tiaw sad nga pag-endorso sa isa ka Presidente nagpasabot ka na nga atong record dili lugar dautan” dugang niini.
Gidugang pa niini nga proud kini isip usa ka Kagay-anon.
“Nagfloat pa ta karon sa akong kalipay nga proud ta as Kagay-anons, nga gi-endorso lugar ta nga una pa gyud ha” dugang pa niini.
Samtang mihatag sab og reaksyon ang kampo ni Jose Gabriel Pompee La Viña, kinsa nagpapili sa pag-kamayor nga normal lang sa Malacañang ang magpahulagway ug dili pa niini makumpirma kung unsa ang kamatuoran niini apan giingong respetohon niini kung kinsa man ang i-endorso ug importante nga nagkahiusa kini batok sa korapsiyon.
“Basin nagpapicture lang kay daghan man gapapicture-picture diha ang Presidente nato maikog. “Kung unsa man ang iyang desisyon atong respituhon, siguro ko nga pag abot sa away batok korap sa City hall usa kami,” matud ni La Viña.