GIPANGHULIPAN ang pipila ka mga hepe sa matag istasyon sa kapulisan sa Cagayan de Oro City Police Office (Cocpo) sa dakbayan sa Cagayan de Oro sugod niadtong Enero 17, 2019.
Nasayran nga ang mga bag-ong hepe mao sila si Police Senior Inspector Rogie Ortencio kinsa mao na ang bag-ong hepe sa Police Station 1 (PS1) sa Divisoria kinsa kanhi hepe sa PS10, si P/Chief Insp. Julius Clark Macariola sa Police Station 3 (PS3) sa Agora, P/Chief Insp. Ian Borinaga sa PS4 sa Carmen, P/Chief Insp. Abdul Alim T Sumandar sa PS5 sa Macabalan, P/Sr.Insp Stephen Benbian Latar sa PS6 sa Puerto, P/Sr. Insp. Jerson Estanilla sa PS8 sa Lumbia, P/Sr.Insp Teodoro de Oro sa PS9 sa Macasandig ug P/Sr.Insp Allan Cairel sa PS10 sa Cugman.
Samtang ang nagpabilin mao sila si P/Sr.Insp. Dennis Quindara sa PS2 sa Cogon ug P/Sr. Insp. Breccia Ruth Townend sa PS7 sa Bulua.
Matud ni P/Supt.Mardy Hortillosa, tigpamaba sa Cocpo nga kini duna na’y kamandoan gikan sa taas ug kabahin na usab kini sa kahigayonan sa mga station commander nga angayang makakuha og investigation course.
Nasayran nga pipila ka mga istasyon ang naapektohan niini diin ang hepe sa istasyon sa PS10 nabalhin sa PS1, samtang si P/Chief Insp. Evan Viñas kanhi hepe sa PS6 sa Puerto mao na ang bag-ong chief admin sa Cocpo. Ang ubang mga kanhi hepe ang giingong gibutang sa posisyon nga wala’y rekisitos sa investigation course.
Giingong magpaabot una ang maong mga hepe og mga anaa sa duha ka bulan og 45 ka adlaw nga magtanyag ang Police Regional 10 sa Camp-Alagar og training ug kung duna na posibleng matigayon na usab ang pagbag-o sa mga opisyal sa matag istasyon.