TIKLO ang tulo ka mga babaye human nga nasapon sa tinugyanan sa kapulisan nga nagsugal niadtong Enero 17, sa Camaman-an, dakbayan sa Cagayan de Oro.
Ang mga nadakpan mao sila si Angeline De Guzman, 24, taga Paglaum, Camaman-an, Irene Salvador, 32, adunay kaipon ug Eliza Camanero, 53, taga Bolonsori, Camaman-an human nasapon nga nagdula og tong-its.
Sa nahipos nga impormasyon, gikabutyag nga nagpahigayon og illegal gambling operation ang tinugyanan sa kapulisan sa Police Station 2 (PS2) sa Cogon ug malampusong nasikop ang maong mga dinakpan.
Nakuha gikan sa ilang posisyon ang mga playing cards ug ang mokabat sa P122 nga salaping cash nga posibleng gigamit nga taya sa moang sugal.
Sa pagsulat niini nga balita, ang mga dinakpan anaa sa buhatan sa kapulisan alang sa posibleng kaso nga ipasaka batok kanila.