NAKABSAN na sa kinabuhi ang usa ka menor de edad human nga gituohang gilugos sa usa ka driver sa motorsiklo niadtong nilabay nga adlaw sa may Barangay Indahag, dakbayan sa Cagayan de Oro.
Ang biktima nag-edad og 15 anyos nga batang babaye, grade-8 ug residente sa Barangay Camaman-an ning dakbayan.
Sa nahipos nga impormasyon, giingong dako ang pagduda sa pamilya nga wala nahulog sa motorsiklo ang biktima apan posibleng gipanamastamasan kini gumikan kay susama nga gibunalan ang ulo niini.
Gidugang pa nga dako ang pagduda sa pamilya tungod kay sama usab nga duna’y mga bun-og sa nagkadaiyang parte sa lawas partikular sa paa ug mga agi sa kuko.
Giingong nasayran na lamang sa pamilya ang taho nga nahulog sa motorsiklo ang biktima ug naparok ang ulo hinungdan nga daling gidala sa tambalanan ug na-comatose apan wala madugay nakabsan ra gihapon sa kinabuhi.
Kasamtangang nagpaabot ang pamilya sa resulta sa otopsiya sa maong patay nga lawas niini.
Sa pagsulat niini nga balita, ang biktima gihaya sa kasamtangan sa ilang panimalay.