LAING pag-ila na sab ang naangkon sa cacao beans sa Puentespina Farms sa Davao City.
Suma pa, ang cacao beans nga gisubmitar alang sa ebalwasyon, gidesignar nga “Heirloom Cacao” sa Heirloom Cacao Preservation (HCP) Fund, usa ka inisyatibo sa Fine Chocolate Industry Association.
Ang pagpahibalo gihimo Enero 12 ning tuig sa usa ka seremonya sa San Francisco.
Suma pa nga ang cacao beans mipailawom sa intensibong ebalwasyon sa mga tigtilaw nga gilangkuban sa siyam ka chocolate experts sa nagkadaiyang parte sa kalibutan.
Sa maong rekognasyon ug designasyon, kalinyada na ang Puentespina Farms sa laing 15 ka “heirloom cacao farmers” sa kalibutan, kini ang, Bolivia, Ecuador, Hawaii, Costa Rica, Belize, Nicaragua, Vietnam, Tanzania ug Madagascar.
“We are elated to be part of this very small group of farmers who have been given this designation as Heirloom Cacao. We are only the 16th to be given this honor, and the first in the Philippines,” suma ni
Charita Puentespina, founder sa Puentespina Farms.
Ang kompanya nagsugod sa pagpalambo sa ilang cacao farm niadtong 2003.
Sukad niini, nagpungasi nga pag-ila sa lokal, nasyunal ug internasyunal nga aspeto ang naangkon sa produkto.
Sa kasamtangan, ang Malagos Chocolates may 28 na ka International awards.
Sa pikas bahin, ang HCP inisyatibo sa Fine Chocolate Industry Association.
Usa kini ka non-profit organization nga gipunduhan uban ang kolaborasyon sa US Department of Agriculture/Agricultural Research Services.
Anaa sab ang ubang chocolate industry professionals, chocolate makers, farmers, ug chocolate enthusiasts. (Uban ang PR)