Legario: Kapahulayan ug pagkamagbubuhat

ATONG nasayran nga kinahanglan nato og pagpahulay usa ka adlaw matag semana.

Kining kapahulayan nagahatag og kaayuhan sa atong panglawas ug sa atong huna-huna.

Apan daghan sa atong mga kahigalaan ang nagapangutana nganong nakalakbit kita og adlaw'ng ikapito, o adlaw'ng Sabado.

Unsa ba gayud ka importante niini alang sa usa ka Kristiyano?

Sa lawom nga pagtuon sa Bibliya, ang pagpahulay o pagpakabalaan sa adlaw'ng ikapito nagahisgot sa mas lawom nga prinsipyo sobra pa sa pagkaplag og kapahulayan.

Genesis 2: 1 ug 2 nagkanayon: “Busa nahuman ang mga langit ug ang yuta, ug ang tanan nga anaa kanila. Ug sa ikapitong adlaw gitapos sa Diyos ang tanan Niyang gibuhat, ug nagpahulay sa ikapitong adlaw...”

Atong hisgutan ang pipila ka mga aspekto niining adlaw'ng igpapahulay.

Una, gibuhat sa Diyos ang kalibutan sa sulod sa unom ka mga adlaw: 1- Kahayag; 2- Espasyo (space); 3- yuta ug mga tanum; 4- adlaw, bulan ug mga bitoon; 5- mga isda ug mga langgam; 6- mga mananap ug tawo (Adan ug Eba).

Sa sulod sa unom ka mga adlaw, natapos sa Diyos ang Iyang buluhaton; kompleto, maayo, ug perpekto (Gen. 1: 31).

Ikaduha, gibuhat Niya ang ikapitong adlaw... oo, ang adlaw mismo. Iya kining gipakabalaan, gipakamaayo, ug gipahulayan (Gen. 2: 3). Oo, ang ikapitong adlaw mismo.

Unya, nganong aduna may ikapitong adlaw kung nahuman naman kaha sa Diyos ang tanan Niyang buluhaton?

Kini gipasantop Niya sa ikaupat sa Napulo ka mga Sugo: “Hinumdomi ang adlaw'ng igpapahulay ug pakabalaana kini... kay sa unom ka mga adlaw ang Ginoo nagbuhat sa mga langit ug sa yuta, ug sa dagat, ug tanan nga anaa kanila, ug nagpahulay sa ikapitong adlaw. Busa gipanalanginan sa Ginoo ang adlaw'ng igpapahulay, ug gipakabalaan kini” (Exodus 20: 8, 11).

Sumala niining teksto, ang pagpahulay sa Diyos sa ikapitong adlaw human sa Iyang pagbuhat dili tungod sa kakapoy- apan usa ka pagselebrar sa Iyang Pagkamagbubuhat (Creatorship). Ug sa Iyang sugo kanato nga atong “hinumdoman, pahulayan ug pakabalaanon ang adlaw'ng ikapito,” nagasugyot Siya kanato nga ato Siyang tuohan nga atong Magbubuhat pinaagi sa pagbantay niining espesyal nga adlaw.

Busa, ang atong pagbantay sa adlaw'ng ikapito, mga higala, mao ang atong pagpakita sa atong pagtuo nga ang Diyos gayud mao ang atong Magbubuhat.

Mao kini ang usa sa mga tinuod nga prinsipyo sa pagbantay sa adlaw'ng ikapito.

Dugang niini, sa atong pagbantay (pagpakabalaan, pagpahulay) sa adlaw'ng ikapito makakaplag kita og kapahulayan gikan sa pisikal o sekular nga kakapoy, ug kalibutanong mga isyu.

Masentro ang atong huna-huna ngadto kang Kristo, ug makatagamtam og dugang alibyo.

Hinaut nga matag-adlaw'ng ikapito, imong mapakita sa tanan kung unsa ang Diyos alang kanimo.