ANG Mindanao, partikular sa Caraga Region, maoy unang makatilaw sa unang bagyo ning tuig, 2019.
Sa pagkakaron, nia na sa sulod sa Philippine Area of Responsibility (PAR) ang daut nga panahon nga mahimo nang bagyo nga tawgong “Amang.”
Sumala sa taho sa Philippine Atmospheric, Geophysical and Astronomical Services Administration (Pagasa) nga katapusang namatikdan ang bagyo sa gilay-on nga 1,000 kilometro sa silangan nga bahin sa Mindanao.
Ug matud pa sa weather bureau nga sugod kagabii magdala na kini og mga pag-ulan nga makaapekto di lang dinhi sa isla, lakip na sab sa pipila ka bahin sa Visayas.
Kon way kausaban ang dagan sa bagyo, mo-landfall kini sa Caraga Region, una molahos sa mga isla sa Central ug Eastern Visayas.
Kini maoy di nato angay nga kompiyasahan kay seguradong mapiskan kita sa mga pag-ulan ug posibleng pagbaha unya kon hingpit nang makalampurnas ang bagyo sa nahisgutang rehiyon.
Di baya kita layo niining rehiyona ug dako ang posibilidad nga kitang taga Davao City makatilaw sab sa mga pag-ulan.
Ug nasayud kita kon mobundak ang ulan dinhi sa dakbayan, seguradong dunay mga lugar nga peligro sa mga pagbaha ug mga pagdahili sa yuta.
Nakatilaw na kita sa nanglabay nga panahon kon unsa ka mangtas ang kusog nga ulan human nga gibaha ang pipila ka dapit dinhi ug nakalasan kita og daghang kinabuhi.
Busa gikinahanglan ang igong pag-igmat, ilabi na gyud panahon sa kagabhion kay dinhi usahay mobundak ang kusog nga mga ulan.
Pahimangno sab sa atong mga kaigsuonan nga naa sa mga daplin sa suba o kaha sa tiilan sa kabukiran, mas nindot kon mangandam kita kanunay aron nga malikayan ang katalagman.
Ang daut nga panahon kabahin kini sa lihok sa kinaiyahan, busa di nato kini mapugngan. Apan duna kitay mahimo aron nga makubsan ang mamahimo unyang damyos nga dala niini ug malikayan ang pagbuhis og kinabuhi.