DIGOS CITY -- Gihimo na sa lokal nga gobyerno ang groundbreaking ceremony timailhan sa pagsugod sa P30 milyones nga proyektong sanitary landfill facility sa dakbayan, niadtong Biyernes.
Ang proyekto nahimutang sa Purol Maligaya, Barangay Lungag.
Mitambong sa aktibidades si Aloysius Garcia, pamuno sa City Environment and Natural Resources Office (Cenro), kinsa nagsulti nga ang lokal nga panggamhanan sa dakbayan maoy nigahin og pundo subay sa mandato sa Republic Act 9003.
“Ang ka-importansiya sa sanitary landfill, sumala sa R.A. 9003 nga gitawag nila'g Ecological Solid Waste Management Act of 2000, diin gi-require ang mga LGU (local government unit) nga magbutang gyud og sanitary landfill,” asoy niya.
Mag-atubang og kaso sa Ombudsman ang LGU nga di makatuman sa maong balaod diin napanday niadto pang 2000.
Nasayran nga tulo pa lang ka LGU ang nakatuman sa maong balaod sud sa Davao Region.
Gimando sa akta nga angayang ilahi sa katawhan ang mga basura gikan sa malata ug di malata.
Ang mga basura nga malata kinahanglan nga malabay sa sanitary landfill.
Angayang ipatuman sab sa lokal nga gobyerno ngadto sa publiko ang “segregation” sa mga basura diha sa ilang panimalay.
Samtang, si Mayor Joseph Peñas, Vice Mayor Reynaldo Hermosisima, kuyog sa mga opisyales sa siyudad ug sa barangay, maoy nanguna sa groundbreaking ceremony. (Orlando B. Dinoy)