Namomba sa mall sa Cotabato signit

COTABATO CITY -- Gidakop sa mga awtoridad ang suspek sa pagpamomba sa mall sa dakbayan niadtong Disyembre 31, 2018, alas 3 sa hapon niadtong Biyernes, Enero 18.

Giila ang dinakpan nga si Datu Muhaliden Usman, 39, ug nagpuyo sa Barangay Rosary Heights 3 sa nahisgutang siyudad.

Gidakop si Usman sa mga intelligence operatives sa militar ug kapulisan atol sa gihimong Peace Assembly for the Ratification sa Bangsamoro Organic Law (BOL) sa Shariff Kabunsuan Complex Bangsamoro Palace sa Cotabato City nga gitambungan ni Pangulong Rodrigo Duterte.

Nasayran nga nagpaaron-ingnon ang suspek nga miyembro sa Moro Islamic Liberation Front (MILF) Secretariat si Usman apan namay-ungan siya sa mga awtoridad ug gidakop ug gidala sa buhatan sa Criminal Investigation and Detection Group (CIDG) sa Autonomous Region in Muslim Mindanao (Armm).

Si Usman giingong sakop ni Shiek Esmail Abdulmalik alyas Kumander Abu Turaife sa Bangsamoro Islamic Freedom Fighters.

Apil ang suspek nga nakuhaan og hulagway sa closed-circuit television (CCTV) camera nga nagbutang og bomba sa ganghaan sa South Seas Mall.

Apan gipanghimakak sa pamilya ni Usman nga nalambigit siya sa pagpamomba ug posibleng mistaken identity lamang.

Imbestigasyon sa dinakpan nagpadayon samtang gisuwat ning balita. (Edgar E. Fuerzas)